Шимолий Корея ҳеч қачон АҚШ, Жанубий Корея ва қўшни давлатлар хавфсизлигига таҳдид солмайди. Бу ҳақда КХДРнинг Бирлашган Миллатлар Ташкилотидаги доимий вакили Ким Сон ташкилот Бош Ассамблеясидаги нутқида айтиб ўтди.

Ким Сон

Фото: UN Photo

«Ер юзида ҳеч бир мамлакат КХДР каби доимий уруш таҳдиди остида қолмаган. Биз ҳарбий тийилиш орқали қонунан ўзни ҳимоя қилиш ҳуқуқини тушунамиз, бу тажовузкор урушни тўхтатиши ва бизни ҳимоя қилиши мумкин », — деди у. — «Биз ҳеч қачон АҚШ, Жанубий Корея ва қўшни давлатлар хавфсизлигини бузмаймиз ёки хавф остига қўймаймиз ».

Унинг сўзларига кўра, АҚШ ва Жанубий Кореянинг ҳарбий таҳдидлари доимий равишда ўсиб бормоқда ва бу давлатлар янги қуролларни ишлаб чиқиш ва кенгайтириш орқали Корея ярим оролидаги «кучлар мувозанатини бузишга» уринмоқда. «АҚШ жуда катта миқдордаги, 700 миллиард доллардан зиёд маблағни гипертовушли қуроллар, янги авлод қитъалараро баллистик ракеталари, стратегик ядровий бомбардимончиларини яратишга сарфламоқда. Бу қуролларнинг барчаси келажакда уруш бошланган тақдирда КХДРга қарши қўллашга мўлжалланган», — дея қўшимча қилди доимий вакил.

КХДР вакилининг нутқидан аввалроқ Жанубий Корея ҳарбийлари Шимолий Корея Япон денгизи томонга навбатдаги баллистик ракетасини учиргани ҳақида маълум қилди. Шунингдек, КХДР 15 ва 13 сентябрь кунлари ракета учиргани ҳақида хабар берилган. Ўшанда Шимолий Корея ҳукумати ракеталар мамлакатнинг янгиланган мудофаа стратегияси доирасида синовдан ўтказилганини айтган.

Ўз навбатида, Япония Мудофаа вазирлиги учирилган ракеталар иқтисодий зона ташқарисидан ўтгани, мамлакат ҳаво ҳудудига кирмаганини билдирди. Шу билан бирга Япония бош вазири Ёсихидэ Суга КХДР фаолиятини ўз мамлакати ва бутун минтақа учун таҳдид деб атади.

26 сентябрь куни БМТ бош котиби Антонио Гутерриш инсоният ядро қуроллари сабабли йўқ бўлиб кетиш ёқасида турганини таъкидлади. «Бутун дунёда 14 мингга яқин ядро қуроллари сақланади. Инсоният ҳамон ядровий қирилиб кетишга ўта яқин турибди. Ядровий зиддият булутларини тарқатиб юбориб, дунёдаги ядровий қурол-яроғларни йўқ қилиш, ишонч ва тинчликнинг янги даврини бошлаш вақти келди», — деб ёзди Гутерриш.

Ўз баёнотини Гутерриш 26 сентябрь куни нишонланадиган Халқаро ядро қуролини тўлиқ йўқ қилиш учун кураш кунига бағишлади. Россия, АҚШ, Буюк Британия, Франция, Хитой, Ҳиндистон, Покистон, КХДР ва Исроил ўз ядро қуролига эга.