Тошкент метрополитенининг поездларидан бирида кузатилган носозлик сабаб йўловчилар бекатда тушириб қолдирилди. Бу ҳақда пойтахт метрополитени матбуот хизмати хабар берди.
Маълум қилинишича, 27 сентябрь куни соат 10:20 атрофида «Халқлар дўстлиги» бекатидан ҳаракатланиши лозим бўлган 3-йўналишдаги ҳаракат таркибида техник носозлик аниқланган. Ҳаракат хавфсизлигини таъминлаш мақсадида йўловчилар бекатда туширилган. Ҳаракат таркиби техник кўрик пунктига жўнатилган.
«Келтирилган ноқулайликлар учун йўловчилардан узр сўраймиз», — дейилади хабарда.
Эслатиб ўтамиз, 22 сентябрь куни Тошкент метрополитенининг Чилонзор йўналишида жойлашган «Халқлар дўстлиги» бекатида поезд вагонларидан бирининг эшигида носозлик кузатилган эди.
Қайд этиш жоизки, март ойидан буён Тошкент метрополитени билан боғлиқ шу каби воқеалар тез-тез юз бермоқда. Хусусан, 18 март куни «Олмазор» (Чилонзор йўли) ва «Бекат-1» (Сергели йўли) орасидаги туннелда икки поезд тўқнашганди.9 апрель куни ижтимоий тармоқларда поезднинг очиқ эшиклар билан ҳаракати туширилган видео тарқалди. Шу билан бирга, метрополитендаги ерости ва ерусти поезд ҳаракатларининг бир нечта бошқа видеолари ҳам ижтимоий тармоқларда кўп бора муҳокама қилинди. 28 апрель куни эса туннелда тўхтаб қолган поезд ҳақидаги видео тарқалди, унда йўловчилар рельслар орқали ҳаракатланиб, бекатга етиб олгани тасвирланган. 13 май куни «Амир Темур хиёбони» бекатида барча йўловчилар тушириб юборилганди. 20 июнь куни «Олмазор» бекатида ҳам худди шу каби ҳолат юз берган, 28 август куни Тошкент метроси поездида кузатилган носозлик сабаб йўловчилар «Тошкент» бекатида тушириб қолдирилган, 20 сентябрь куни эса Тошкентда метро поезди «Ғофур Ғулом» бекатида тўхтаб қолганди.
Изоҳ (0)