ИИВ ЙҲХББ ижтимоий тармоқларда тарқалган Тошкентда беш нафар ЙПХ ходими Spark ҳайдовчисига куч ишлатиб, уни машинадан туширишга урингани тасвирланган видео бўйича маълумот берди.
Ижтимоий тармоқларда ЙПХ ходимлари Spark ҳайдовчисига куч ишлатиб, уни машинадан туширишга урингани тасвирланган видео тарқалди.
Маълум қилинишича, 19 сентябрь куни соат 19:40 ларда Чилонзор туманининг Фурқат ва Бешёғоч кўчалари кесишган чорраҳа яқинида, Magic City истироҳат боғи олдида тўхтаб турган Spark ҳайдовчисига ЙПХ ходими мазкур жойда тўхтаб туриш мумкин эмаслигини, тирбандлик юзага келаётгани тушунтирган. Ҳайдовчи А.Э. эса такси фаолияти билан шуғулланишини айтиб ходимга эътирозлар билдирган. ЙПХ ходими ҳайдовчидан қоидаларга риоя қилишини сўраган вақтда у автомобилини қўзғатмаслигини маълум қилган ва ўзаро тортишувли вазият юзага келган.
Ҳайдовчи ЙПХ ходимининг қонуний талабларини бажармагани сабаб жараёнга бошқа ЙПХ ходимлари ҳам аралашган. Фуқаро А.Э. туман ИИО ФМБга олиб борилган ва тегишли ҳужжатлар расмийлаштирилган.
22 сентябрь куни тўпланган ҳужжатлар жиноят ишлари бўйича Чилонзор тумани суди томонидан ўрганилиб, фуқаро А.Э. Маъмурий жавобгарлик тўғрисидаги кодекснинг 183 ҳамда 194-моддаларида (майда безорилик, ички ишлар органлари ходимининг қонуний талабларини бажармаслик) кўрсатилган ҳуқуқбузарликни содир қилганликда айбли деб топилиб, унга нисбатан БҲМнинг 3 баравари (810 минг сўм) миқдорида жарима жазоси белгиланган.
Аввалроқ Тошкентда ЙПХ ходимларига фаол қаршилик кўрсатган эркакка нисбатан жиноят иши очилгани, Тошкентда ЙПХ ходимларидан қочишга уринган Spark ҳайдовчиси ушлангани тўғрисида хабар берилганди.
Изоҳ (0)