IIV YHXBB ijtimoiy tarmoqlarda tarqalgan Toshkentda besh nafar YPX xodimi Spark haydovchisiga kuch ishlatib, uni mashinadan tushirishga uringani tasvirlangan video bo‘yicha ma’lumot berdi.
Ijtimoiy tarmoqlarda YPX xodimlari Spark haydovchisiga kuch ishlatib, uni mashinadan tushirishga uringani tasvirlangan video tarqaldi.
Ma’lum qilinishicha, 19-sentabr kuni soat 19:40 larda Chilonzor tumanining Furqat va Beshyog‘och ko‘chalari kesishgan chorraha yaqinida, Magic City istirohat bog‘i oldida to‘xtab turgan Spark haydovchisiga YPX xodimi mazkur joyda to‘xtab turish mumkin emasligini, tirbandlik yuzaga kelayotgani tushuntirgan. Haydovchi A.E. esa taksi faoliyati bilan shug‘ullanishini aytib xodimga e’tirozlar bildirgan. YPX xodimi haydovchidan qoidalarga rioya qilishini so‘ragan vaqtda u avtomobilini qo‘zg‘atmasligini ma’lum qilgan va o‘zaro tortishuvli vaziyat yuzaga kelgan.
Haydovchi YPX xodimining qonuniy talablarini bajarmagani sabab jarayonga boshqa YPX xodimlari ham aralashgan. Fuqaro A.E. tuman IIO FMBga olib borilgan va tegishli hujjatlar rasmiylashtirilgan.
22-sentabr kuni to‘plangan hujjatlar jinoyat ishlari bo‘yicha Chilonzor tumani sudi tomonidan o‘rganilib, fuqaro A.E. Ma’muriy javobgarlik to‘g‘risidagi kodeksning 183 hamda 194-moddalarida (mayda bezorilik, ichki ishlar organlari xodimining qonuniy talablarini bajarmaslik) ko‘rsatilgan huquqbuzarlikni sodir qilganlikda aybli deb topilib, unga nisbatan BHMning 3 baravari (810 ming so‘m) miqdorida jarima jazosi belgilangan.
Avvalroq Toshkentda YPX xodimlariga faol qarshilik ko‘rsatgan erkakka nisbatan jinoyat ishi ochilgani, Toshkentda YPX xodimlaridan qochishga uringan Spark haydovchisi ushlangani to‘g‘risida xabar berilgandi.
Izoh (0)