Тошкентда 22 сентябрь куни икки қаватли бинода ёнғин чиққани айтилган хабарлар ва ҳодиса жойидан олинган видеолар ижтимоий тармоқларда тарқалди. ФВВ матбуот хизмати ушбу ёнғин ҳақида расмий маълумот берди.
Унда айтилишича, шу куни соат 12:58 да Тошкент шаҳар ФВБга Олмазор тумани Форобий кўчаси 418-уйда жойлашган икки қаватли «Миллий таомлар» ошхонасига мўлжалланган бинода ёнғин содир бўлаётгани тўғрисида хабар келиб тушган.
Хабарга кўра, 4 та ёнғин-ўчириш экипажлари соат 13:01 да воқеа жойига етиб бориб, ёнғин соат 13:22 да қуршаб олинган ва соат 13:34 да тўлиқ бартараф этилган.
Фото: ФВВ матбуот хизмати
Ёнғин оқибатида бинонинг 150 квадрат метр майдондаги ички ва том қисми ёниб зарарланган. Тезкор ҳаракатлар натижасида бинонинг 300 квадрат метр майдони ёнғиндан сақлаб қолинган.
Ҳодиса оқибатида ҳалок бўлган ва жабрланганлар йўқ. Ҳозирда ёнғин сабаби аниқланмоқда.
Бундан аввал Тошкентнинг Юнусобод туманидаги ошхонада ёнғин келиб чиққани ҳақида хабар берилган эди. Ёнғин натижасида ошхонанинг тахминан 150 квадрат метр майдонида том ва шифт қисми ёниб зарарланган. Ундан аввалроқ эса Яшнобод туманида жойлашган кафеда ёнғин чиқиб, унга туташ бўлган уйларга ҳам ўтганди.
