Ўзбекистон терма жамоасининг 5 сентябрь куни Швецияга қарши ўртоқлик учрашувида ўнг қанот ҳимоячиси Фаррух Икромов жароҳат олганди. Текширувлар натижасида ушбу жароҳат жиддий экани ва жарроҳлик амалиёти талаб этилиши маълум бўлди.
19 сентябрь куни Ўзбекистон футбол ассоциацияси (ЎФА) вице-президенти Равшан Эрматов ва Ўзбекистон миллий терма жамоаси бош мураббийи Сречко Катанец Фаррух Икромовнинг хонадонида бўлиб, футболчининг саломатлиги ва аҳволидан хабар олди.
ЎФА томонидан футболчининг тезроқ соғайиб, сафга қўшилиши учун барча шароитлар яратиб берилиши маълум қилинди. ЎФА Икромовни даволашга Италиянинг машҳур жарроҳларидан бири Паоло Марианини жалб этган.
23 сентябрь куни футболчи Италия пойтахти Римга, «Villa Stuart» клиникасига йўл олади ва у ерда профессор Мариани томонидан операция қилинади, дея маълум қилмоқда ЎФА матбуот хизмати.
Қайд этиш керак, футболчи ФИФА кунлари вақтида терма жамоа сафида жароҳат олса ва узоқ муддатга сафдан чиқса, ФИФА унинг клубига компенсация тўлаб бериши белгиланган. «Дарё» мухбири Фаррух Икромовнинг жароҳати билан боғлиқ вазиятни аниқлаштириш учун «Бунёдкор» клуби бош директори Улуғбек Мирзаев билан боғланди.
Фаррух Икромовнинг операциясига 20 минг евро кетади. Операция, бориш-келиш, реабилитация харажатларини ЎФА тўлаб беради. ФИФА Club Protection Programme (CPP) дастурига кўра, ФИФА кунларида жароҳатланган футболчи 28 кундан ортиқ муддатга сафдан чиқса, ФИФА унинг маошини тўлаб бериши керак. Фаррух Икромов 4—5 ой майдонга туша олмайди. Биз ҳозирда мана шу вазият борасида ҳужжат йиғяпмиз. Ҳужжатларни ФИФАга топширсак, Икромовнинг маоши компенсация қилиб берилади.Улуғбек Мирзаев, «Бунёдкор» клуби бош директори
Club Protection Programme — ФИФА кунларида терма жамоа ихтиёрида бўлган футболчи жароҳатланса, клубларга ёрдам бериш мақсадида футболчининг маошини тўлаб берадиган суғурта дастури. Ушбу дастур 2012 йилнинг май ойида Будапештда бўлиб ўтган ФИФА Конгрессида тасдиқланган. Футболчи 28 кундан 365 кунгача бўлган муддатга сафдан чиқса, клуб унга тўлаши керак бўлган маошини (кўпи билан 7,5 миллион еврогача) ФИФА компенсация сифатида тўлаб беради.
Изоҳ (0)