ФВВ ижтимоий тармоқларда тарқалган Андижон шаҳридаги боғчаларнинг бирида ёнғин содир бўлаётгани тасвирланган видео юзасидан маълумот берди.

Фото: ФВВ матбуот хизмати

Ижтимоий тармоқларда Андижон шаҳри, 2-микрорайон 50-мактаб ёнидаги боғча ёнаётгани тўғрисида хабарлар тарқалди.

Маълум қилинишича, 20 сентябрь куни соат 11:30 да Андижон вилояти Фавқулодда вазиятлар бошқармасига Андижон шаҳар 2-кичик даҳасида жойлашган 38-болалар боғчаси ҳудудида ёнғин содир бўлаётгани тўғрисида хабар келиб тушган.

Хабарга кўра, ёнғин-қутқарувчилар зудлик билан воқеа жойига етиб борган ва ёнғин қисқа муддатда тўлиқ бартараф этилган.

Аниқланишича, боғчада таъмирлаш ишлари олиб борилаётгани сабабли вақтинча иш фаолияти тўхтатилган. Ёнғин оқибатида боғча ҳудудида 2 метр квадрат майдонда қурилиш чиқиндилари ва хас-хашаклар ёнган. Ҳодиса оқибатида ҳалок бўлган ва жабрланганлар йўқ. Ҳозирда ёнғин сабаби аниқланмоқда.

Аввалроқ Наманганда талабалар турар жойида ёнғин келиб чиққани, Самарқанддаги савдо мажмуасида ёнғин юз бериб, 20 та дўконга зарар етгани тўғрисида хабар берилганди.