Турк сериаллари йилдан йилга оммалашиб бормоқда ва бу, албатта, актёрлар даромадига ҳам ўз таъсирини ўтказмай қолмайди.
Кутилганидек, турк актёрлари ичида Бурак Ўзчивит гонарар миқдори бўйича етакчилик қилмоқда. Сериалнинг ҳар бир қисми учун актёр 250 минг турк лираси ёки салкам 29 минг доллар ишлаб топади. Шундай қилиб, юлдузнинг ойлик даромади бир миллион лирадан ошади.
Бурак ҳозирда энг машҳур турк актёри ҳисобланади. Унинг иштирокидаги сериаллар барча рекордларни янгилаган. Миллионлаб мухлислар юлдузнинг ижтимоий тармоқлардаги саҳифасига обуна бўлади.
Мавзуга доир: Турк киносининг юлдузли жуфтлиги Бурак Ўзчивит ва Фаҳрие Эвжен ўғлининг 2 ёшга тўлганини нишонлади (фото)
Ҳалит Эргенч ҳам бу борада Ўзчивитдан қолишмайди. «Муҳташам юз йил» сериалида Султон Сулаймон образини ижро этган актёр сериалдаги ҳар бир эпизоди учун 250 минг лирага яқин гонарар олган. Аммо унинг иши ёш ҳамкасбига қараганда бироз камроқ, шу сабабли ҳам йиллик даромади Ўзчивитникига етмайди.
Юқоридаги актёрлардан кейинги ўринни Киванч Татлитуғ эгаллади. Унинг стандарт гонорари — ҳар бир эпизод учун 200 минг лира (23 минг доллар)ни ташкил қилади. Кенан Имирзали ўғли ҳам шунча миқдорда гонарар олади.
Аммо аёлларга бериладиган пул эркакларникига қараганда анча паст. Етакчилар орасида Бурак Ўзчивитнинг рафиқаси Фаҳрие Эвжен ҳам бор. Актриса ҳар бир эпизод учун, тахминан, 150 минг лира олади (16 минг доллар). Маълум бўлишича, эр-хотин ҳозирда турк шоу-бизнесининг энг муваффақиятли ва бадавлат жуфтлиги ҳисобланади.
Берен Соат, Серенай Сарикая ва Жансу Дере ҳам деярли шунча ҳақ олади. Айнан мана шу актрисаларга ҳозир Туркияда талаб катта, шунинг учун улар ўз ишлари учун кўпроқ гонарар талаб қилишлари мумкин.
Эслатиб ўтамиз, маҳаллий телесериаллар ўртача олганда 100 қисмдан иборат бўлади. Фақат битта лойиҳанинг ўзигина юлдузга яхшигина даромад олиб келиши мумкин. Шу билан бирга, турк шоу-бизнесида кучли рақобат бўлишини ҳам ёддан чиқармаслик лозим. Катта мухлислар армияси билан мақтана олмайдиган бошқа актёр ва актрисалар эса 10 минг лирадан кам ҳақ олади.
Изоҳ (0)