Ўз вилоятида уй билан тақдирланган паралимпиячилар, ЕЧЛдан воз кечиш ва янги Еврокубок учун 10 млрд евро, мураббийни алмаштириш арафасида турган «Барселона». Энг сўнгги спорт янгиликлари

Дунё ва ўзбек спортига оид 15 сентябрь кунининг энг муҳим хабарлари дайжести билан танишинг.

Ўзбекистон

Жаҳон чемпионатида иштирок этаётган Ўзбекистон футзал терма жамоаси 15 сентябрь куни Россияга қарши баҳс олиб боради. Биринчи турда Гватемаладан аламли мағлубиятни қабул қилиб олган ўзбекистонлик футзалчилар кучли рақибдан очко тортиб олишга ҳаракат қилади, акс ҳолда гуруҳдан чиқиш масаласи қийин бўлиб қолиши мумкин. Россия дастлабки турда Миср терма жамоасини 9:0 ҳисобида таслим этганди.

Токио—2020 Олимпия ва Паралимпия ўйинларида совриндор бўлган спортчилар тақдирланишда давом этмоқда. Бу сафар вилоят ҳокимликлари атлет ва параатлетларни мукофотлади. Самарқанд вилояти ҳокими Эркинжон Турдимов Паралимпия ўйинлари чемпиони Ҳусниддин Норбековга Самарқанд шаҳридан уч хонали уй, Паралимпия ўйинлари кумуш медал соҳиби Парвина Самандарова ва дзюдо бўйича Олимпия ўйинлари бронза медали эгаси Давлат Бобоновга икки хонали уй калитини топширди. Шунингдек, ўйинларга лицензияни қўлга киритган спортчиларга Самарқанд шаҳридан бошланғич тўлови тўланган икки хонали уй ҳамда уларнинг мураббийларига 25 миллион сўмдан пул мукофоти берилди.

Хоразм вилоятида ҳам маҳаллий спортчилар муносиб тақдирланди. Вилоят ҳокими Фарҳод Эрманов Паралимпия ўйинларида олтин медални қўлга киритган Учқун Қуронбоев ва унинг мураббийи Алфия Ибрагимованинг ҳар бирига икки хонали, пауэрлифтингчи Рўза Қўзиева ва парадзюдочи Нафиса Шарипбоевага эса бир хонали уй калитини топширилди.

Аввалроқ Андижон вилояти ҳокими Паралимпия ўйинлари олтин медали совриндори Бобур Омоновга Андижон шаҳридан 2-хонали хонадон совға қилганди.

Жаҳон

Европа майдонларида 14 сентябрь куни Чемпионлар Лигасининг гуруҳ босқичи старт олди. Дастлабки кунда тўртта гуруҳда 1-тур учрашувлари ўтказилди.

«Барселона» 24 йил деганда илк бор Чемпионлар Лигасини мағлубият билан бошлади. Каталонлар ўз уйида «Бавария»га 0:3 ҳисобида имкониятни бой бериб қўйди. «Барселона» кетма-кет учинчи марта Мюнхен клубига мағлуб бўлди.

Кутилмаган натижа эса Швейцариядаги ўйинда юз берди. «Манчестер Юнайтед» «Янг Бойз»га қарши баҳсда (1:2) Аарон Уан-Биссаканинг четлатилишидан кейин бир ўйинчи кам бўлиб қолди ва сўнгги дақиқаларда гол ўтказиб, имкониятни бой берди. Оле-Гуннар Сульшер шогирдлари бу ўйинда рақиб дарвозаси томон 2 та зарба берди. Бу клуб учун статистика юритилиши бошланган 2003/04 йилги мавсумдан бери энг ёмон кўрсаткич ҳисобланади. Зарбанинг иккисини ҳам Роналду ижро этди. Роналдунинг ўрнига тушган Жесси Лингард сўнгги сонияларда хатога йўл қўйди ва мезбонлар ғалаба тўпини киритишга эришди.

Ушбу ўйиндан олдин кутилмаган ҳолат юз берди. Роналдунинг машғулот вақтида йўллаган зарбасидан кейин тўп қўриқчи аёлга тегди ва уни мувозанатдан чиқарди. Криштиану дарҳол аёлнинг ёнига борди ва узр сўради. Учрашувдан кейин футболчи либосини қўриқчи аёлга тақдим қилди.

15 сентябрь оқшомида 1-турнинг қолган учрашувлари ўтказилади. Жасур Яхшибоевнинг «Шериф» клуби «Шахтёр»га қарши баҳс юритади. Учрашув Тошкент вақти билан 21:45 да бошланади.

Рональд Куманнинг курсиси «қимирлаб» қолди

«Бавария»га учралган мағлубиятдан кейин «Барселона» президенти, Куман ва раҳбариятнинг айрим вакиллари иштирокида мажлис ўтказилган. Бу мажлис кескин кайфиятда ўтган, дея хабар қилмоқда El Chiringuito. Айрим ОАВ каталон клуби Куман ўрнига бошқа мураббий қидиришга тушгани ҳақида айтмоқда.

Еврокубокларга қарши кураш давом этади

«Наполи» президенти Аурелио де Лаурентис ЕЧЛ ва Европа Лигаси мусобақалари ўрнига бошқа турнир ташкил қилиш ҳамда футбол қоидаларига ўзгартиришлар киритишни таклиф қилди. Унинг таклифи Европа Суперлигаси ғоясига ўхшаш, фақат унга кириш спорт принциплари бўйича бўлади.

Тизим ишламаяпти. Чемпионлар Лигаси ва Европа Лигаси клубларга фойда келтирмаяпти. Бутун Европа миллий лигаларидаги клублар сонини камайтириш эвазига ўйинлар сонини қисқартириш лозим. Бундан ташқари ички чемпионатлардаги натижаларга қараб иштирок этиш мумкин бўлган янги Еврокубокни жорий қилиш керак. Мен лойиҳани ўрганиб чиқдим ва 10 миллиард евро сармоя киритишга тайёрман.

Агар футбол қоидаларини ўзгартириб, уни янада қизиқарлироқ қилмасак, ёш авлод бизни ташлаб кетади. Тадқиқотларга кўра 25 ёшдан кичик бўлган болалар футбол томоша қилмай қўйган ва ўз смартфонига тикилишни маъқул кўради.

Аурелио де Лаурентис, «Наполи» президенти

Канело суперўрта вазн тоифасининг мутлақ чемпионлиги учун жанг қилади

Суперўрта вазн тоифасида WBC, WBA ва WBO камарлари соҳиби Сауль Альварес 6 ноябрь куни АҚШнинг Лас-Вегас шаҳрида IBF камарига эгалик қилаётган Калеб Плантга қарши рингга кўтарилади. Бу жанг дивизионнинг мутлақ чемпионлиги учун кечади.

Альварес сўнгги бир неча ой ичида Билли Жо Сондерс, Авни Йилдирим ва Каллум Смит каби кучли боксчиларни мағлуб этишга муваффақ бўлди.