Тошкент вилоятида ЙПХ ходими сифатида фаолият юритган сержант Дилмурод Ўрмонов маст ҳайдовчи бошқарувидаги машина уриб кетиши оқибатида вафот этди. Бу ҳақда вилоят ИИББ ахборот хизмати хабар қилди.

Фото: Тошкент вилояти ИИББ

Маълум қилинишича, 2021 йилнинг 11 сентябрь куни Тошкент вилоятида жиноятчиликнинг олдини олиш юзасидан ўтказилаётган профилактик тадбир давомида Пискент тумани ҳудудида хизмат бурчини бажараётган ЙПХ инспектори сержант Дилмурод Ўрмонов, ҳайдовчи 1992 йилда туғилган Ш.А. (мастлик ҳолатида) бошқарувидаги Lacetti автомашинасига тўхташ ишорасини беради.

Ҳайдовчи эса ИИО ходимининг қонуний талабига бўйсунмай ҳаракатни давом эттирган ва 1991 йилда туғилган Пискент тумани ИИБ ЙҲХБ қидирув ва суриштирув бўйича инспектори, сержант Дилмурод Ўрмоновни уриб юбориб ЙТҲ содир этади.

Оқибатда кўрсатилган тиббий муолажага қарамай сержант Дилмурод Ўрмонов олган тан жароҳатлари билан шифохонада 14 сентябрь куни вафот этди.

Тошкент вилояти ЙХҲБнинг «Дарё»га маълум қилишича, ҳайдовчига нисбатан жиноий иш очилган.