Сирдарё вилояти Ховос тумани ҳудудида ҳуқуқ-тартибот идоралари ҳамкорлигида ўтказилган тезкор тадбирда майнинг-фермалардан ноқонуний равишда фойдаланиб келган шахслар аниқланди. Бу ҳақда вилоят Божхона бошқармаси матбуот хизмати хабар берди.
Маълум қилинишича, тезкор тадбир давомида Ховос туманида яшовчи Ўзбекистон фуқароси Э.Д.нинг яшаш хонадони ёрдамчи хўжалик бинолари кўздан кечирилганида Х.И. исмли шахс компьютер эҳтиёт қисмларидан қўлбола усулда ясалган, катта ҳажмдаги крипто актив қурилмаларидан лицензиясиз ноқонуний равишда шуғулланиб келаётгани аниқланган.
Шунингдек, тезкор тадбир давомида ушбу ҳолат юзасидан туман электр тармоқлари корхонасидан мутахассис иштирокида электр энергиясидан фойдаланиш ҳолати ўрганилганда қонунга хилоф равишда 265,2 миллион сўм миқдорида электр энергиясидан ноқонуний фойдаланиш ҳолати аниқланиб, белгиланган тартибда далолатнома расмийлаштирилган. Шунингдек, мазкур тезкор тадбир давомида фуқаро Э.Д. ва Х.И.дан 11 турдан иборат жами 3529 дона, тахминий қиймати 9,2 миллиард сўмлик компьютер қурилмалари ва бошқа турдаги товар-моддий бойликлари ашёвий далил сифатида вақтинча сақловга олинган.
Ҳолат юзасидан олиб борилган дастлабки текширув ва суриштирув натижасида бундай ноқонуний фаолиятни Жанубий Корея давлати фуқароси С.Й. ва Ўзбекистон фуқароси Х.И. ўзаро олдиндан тил бириктириб, қонун талабларига зид равишда фаолият олиб бораётгани маълум бўлган.
Мазкур ҳолат юзасидан божхона органлари томонидан божхона текширувлари ва суриштирув ишлари олиб борилмоқда.
Аввалроқ қозоғистонлик майнерлар солиқлар сабаб Ўзбекистонга кўчиб ўтиши мумкинлиги тўғрисида хабар берилганди.
Изоҳ (0)