Сурхондарёда уриб туширилган афғон самолётининг икки учувчиси жонлантириш бўлимидан чиқарилди

Сурхондарё вилоятининг Шеробод туманида 15 август куни кечқурун Афғонистон фарқлаш белгилари бўлган самолёт қулаб тушиши оқибатида самолётнинг икки учувчиси Термиздаги жонлантириш бўлимига ётқизилгани ҳақида хабар берилган эди. Sputnik’нинг маълум қилишича, улар жонлантириш бўлимидан чиқарилди.

«Уларнинг ҳолати яхшиланди, улар жонлантириш бўлимидан травматология бўлимига ўтказилган, иккаласи ҳам ҳушига келган», — деб таъкидлаган Республика шошилинч тиббий ёрдам илмий маркази Термиз филиали ходими. Унинг айтишича, айни вақтда учувчиларнинг аҳволи ўртача оғир дея баҳоланмоқда.

Эслатиб ўтамиз, Сурхондарё вилояти Мудофаа ишлари бошқармаси вакили «Дарё» мухбири билан суҳбатда Шерободга Афғонистон самолёти қулаганини қисман тасдиқлаганди. «Кўзим билан кўрганим йўқ, аммо самолёт бор дейишди», — деган эди бошқарма вакили.

Кейинроқ Бош прокуратура Афғонистоннинг 22 та ҳарбий самолёти ва 24 та ҳарбий вертолёти 14—15 август кунлари Ўзбекистон ҳаво ҳудуди чегарасидан ноқонуний ўтганини маълум қилди. Идоранинг таъкидлашича, барча учоқлар Термиз халқаро аэропортига мажбурий қўндирилган, уларнинг бортида жами 585 нафар афғонистонлик қуролланган ҳарбий хизматчилар бўлган.

15 август куни Афғонистоннинг учта Embraer-314 ҳарбий самолёти Қашқадарёдаги «Хонобод» аэродромига қўниш учун рухсат сўраган, бироқ уларга Термиз аэропортига қўниш ҳақида огоҳлантириш берилган ҳамда Ўзбекистоннинг иккита МиГ-29 қирувчи самолёти томонидан кузатувга олинган.

«Лекин кузатув давомида Embraer-314 ва МиГ-29 самолётлари тўқнашиб, Сурхондарё вилоятининг Шеробод тумани ҳудудига қулаган. Ушбу самолётлар учувчилари парашют (катапульт) орқали ерга тушган», — дейилган Бош прокуратура ахборотида, учувчилар аҳволи ҳақида эса маълумот берилмаган. Орадан кўп ўтмай Бош прокуратура ўзи тарқатган мазкур расмий ахборотга раддия бериб чиқди.

Бундан аввал Ўзбекистон Ташқи ишлар вазирлиги вакили 14 август куни 84 афғон ҳарбийлари Ўзбекистон билан чегарани кесиб ўтиб, ёрдам сўраганини маълум қилганди. Афғонистон билан чегарадош бўлган Сурхондарё вилоятининг Термиз туманидаги чодирли лагерга 100 дан ортиқ афғонистонлик қочқинлар жойлаштирилган. Спутник маълумотларига кўра, қочқинлар сони 150 га яқин, улардан 17 нафари аёллар ва болалар. Бу одамларнинг яшаш муддати ва кейинги тақдири ҳақида ҳозирча хабар берилмаган.