Surxondaryo viloyatining Sherobod tumanida 15-avgust kuni kechqurun Afg‘oniston farqlash belgilari bo‘lgan samolyot qulab tushishi oqibatida samolyotning ikki uchuvchisi Termizdagi jonlantirish bo‘limiga yotqizilgani haqida xabar berilgan edi. Sputnik’ning ma’lum qilishicha, ular jonlantirish bo‘limidan chiqarildi.
“Ularning holati yaxshilandi, ular jonlantirish bo‘limidan travmatologiya bo‘limiga o‘tkazilgan, ikkalasi ham hushiga kelgan”, — deb ta’kidlagan Respublika shoshilinch tibbiy yordam ilmiy markazi Termiz filiali xodimi. Uning aytishicha, ayni vaqtda uchuvchilarning ahvoli o‘rtacha og‘ir deya baholanmoqda.
Eslatib o‘tamiz, Surxondaryo viloyati Mudofaa ishlari boshqarmasi vakili “Daryo” muxbiri bilan suhbatda Sherobodga Afg‘oniston samolyoti qulaganini qisman tasdiqlagandi. “Ko‘zim bilan ko‘rganim yo‘q, ammo samolyot bor deyishdi”, — degan edi boshqarma vakili.
Keyinroq Bosh prokuratura Afg‘onistonning 22 ta harbiy samolyoti va 24 ta harbiy vertolyoti 14—15-avgust kunlari O‘zbekiston havo hududi chegarasidan noqonuniy o‘tganini ma’lum qildi. Idoraning ta’kidlashicha, barcha uchoqlar Termiz xalqaro aeroportiga majburiy qo‘ndirilgan, ularning bortida jami 585 nafar afg‘onistonlik qurollangan harbiy xizmatchilar bo‘lgan.
15-avgust kuni Afg‘onistonning uchta Embraer-314 harbiy samolyoti Qashqadaryodagi “Xonobod” aerodromiga qo‘nish uchun ruxsat so‘ragan, biroq ularga Termiz aeroportiga qo‘nish haqida ogohlantirish berilgan hamda O‘zbekistonning ikkita MiG-29 qiruvchi samolyoti tomonidan kuzatuvga olingan.
“Lekin kuzatuv davomida Embraer-314 va MiG-29 samolyotlari to‘qnashib, Surxondaryo viloyatining Sherobod tumani hududiga qulagan. Ushbu samolyotlar uchuvchilari parashyut (katapult) orqali yerga tushgan”, — deyilgan Bosh prokuratura axborotida, uchuvchilar ahvoli haqida esa ma’lumot berilmagan. Oradan ko‘p o‘tmay Bosh prokuratura o‘zi tarqatgan mazkur rasmiy axborotga raddiya berib chiqdi.
Bundan avval O‘zbekiston Tashqi ishlar vazirligi vakili 14-avgust kuni 84 afg‘on harbiylari O‘zbekiston bilan chegarani kesib o‘tib, yordam so‘raganini ma’lum qilgandi. Afg‘oniston bilan chegaradosh bo‘lgan Surxondaryo viloyatining Termiz tumanidagi chodirli lagerga 100 dan ortiq afg‘onistonlik qochqinlar joylashtirilgan. Sputnik ma’lumotlariga ko‘ra, qochqinlar soni 150 ga yaqin, ulardan 17 nafari ayollar va bolalar. Bu odamlarning yashash muddati va keyingi taqdiri haqida hozircha xabar berilmagan.
Izoh (0)