Xiaomi компанияси япон алоқа операторларидан 260 доллар қийматида харид қилиш мумкин бўлган Redmi Note 10 JE смартфонини тақдим этди, деб хабар беради IXBT.
Redmi Note 10 JE чанг ва намликдан Xiaomi Mi 11 Ultra флагмани каби IP68 стандарти бўйича ҳимояланган. Смартфон FHD+ сифатли (2400х1080 пиксел) 6,5 дюймга тенг дисплейга, бешинчи авлод алоқа тармоғини қўллаб-қувватловчи бир кристалли Qualcomm Snapdragon 480 процессорига эга бўлган. Таъкидлаш керакки, ҳатто Huawei P50 Pro камерофонида 5G йўқ.
Redmi Note 10 JE’га 8 мегапикселли фронтал камера, шунингдек, 48 мегапикселли асосий камера ўрнатилган. Тезкор хотираси 4 гигабайтни, ички хотираси эса 64 гигабайтни ташкил этади. Аккумулятор сиғими 4800 мА/соатга тенг бўлиб, 18 ваттли тезкор қувватланиш функциясига эга.
Смартфон ўлчамлари 163х76х10,3 миллиметр бўлиб, оғирлиги 200 граммни ташкил этади. Смартфоннинг ён томонида бармоқ изи сканери, фойдаланувчи юзини таниш функцияси ва NFC модули мавжуд. Қурилма 13 августдан сотувга чиқади.
Аввалроқ Redmi геймерлар учун биринчи смартфони — K40 Game Enhanced Edition’ни тақдим этгани тўғрисида хабар берилганди.