Xiaomi kompaniyasi yapon aloqa operatorlaridan 260 dollar qiymatida xarid qilish mumkin bo‘lgan Redmi Note 10 JE smartfonini taqdim etdi, deb xabar beradi IXBT.
Redmi Note 10 JE chang va namlikdan Xiaomi Mi 11 Ultra flagmani kabi IP68 standarti bo‘yicha himoyalangan. Smartfon FHD+ sifatli (2400x1080 piksel) 6,5 dyuymga teng displeyga, beshinchi avlod aloqa tarmog‘ini qo‘llab-quvvatlovchi bir kristalli Qualcomm Snapdragon 480 protsessoriga ega bo‘lgan. Ta’kidlash kerakki, hatto Huawei P50 Pro kamerofonida 5G yo‘q.
Redmi Note 10 JE’ga 8 megapikselli frontal kamera, shuningdek, 48 megapikselli asosiy kamera o‘rnatilgan. Tezkor xotirasi 4 gigabaytni, ichki xotirasi esa 64 gigabaytni tashkil etadi. Akkumulyator sig‘imi 4800 mA/soatga teng bo‘lib, 18 vattli tezkor quvvatlanish funksiyasiga ega.
Smartfon o‘lchamlari 163x76x10,3 millimetr bo‘lib, og‘irligi 200 grammni tashkil etadi. Smartfonning yon tomonida barmoq izi skaneri, foydalanuvchi yuzini tanish funksiyasi va NFC moduli mavjud. Qurilma 13-avgustdan sotuvga chiqadi.
Avvalroq Redmi geymerlar uchun birinchi smartfoni — K40 Game Enhanced Edition’ni taqdim etgani to‘g‘risida xabar berilgandi.
Izoh (0)