«Дарё»ни Telegram’да ўқинг! Join!
18:53, 01.08.2021 45234

Дунё бўйича стюардессаларнинг энг чиройли либослари (фото)

Стюардессалар ишининг мураккаблиги, турли ҳолатларда қийинчиликлар келиб чиқиш мумкинлигига қарамай ҳамиша мафтункор ва гўзал кўринади. Компаниянинг юзи ҳисобланган мазкур ходимларнинг ташқи кўриниши мукаммал бўлишида уларнинг кийими ҳам муҳим роль ўйнайди. Дизайни ва қулайлиги билан ўзига хос бўлган дунёдаги энг чиройли формалар суратини эътиборингизга ҳавола қиламиз.

SkyUp

Фото: Marie Claire

Украина авиакомпанияси стюардессаларининг юниформаси ёрқин ранги ва бичими билан ўзига хос саналади. Қайта дизайнлаш бўйича лойиҳа куратори Ольга Сареградскаянинг айтишича, асосий мақсад — фаол позицияга эга замонавий қиз образ яратишдан иборат бўлган. SkyUp’нинг янги формасини ишлаб чиқиш учун Украинанинг икки бренди таклиф қилинган. GUDU дизайнери Лаша Мдинарадзаде образнинг чизмасини чизган, костюмлар учун махсус андоза ишлаб чиққан. Шунингдек, образга куз ва ёз коллекциясидан пальто қўшган. GUNIA Project жамоаси эса стюардессаларнинг жакети ва пальтосининг елка қисмига қадаладиган ва авиакомпания формасининг рамзий белгиси ҳисобланган шойи рўмолдаги принтни ишлаб чиққан. Пошнали туфлилар эса қулай ва ҳаракатланиш осон бўлган Nike кроссовкаларига алмаштирилган.

Emirates

Фото: Marie Claire

Emirates — ушбу авиакомпания нафақат бекаму кўст хизмат кўрсатиши, балки ходимларнинг намунали ташқи кўриниши билан ҳам машҳурдир. 1997 йилда ишлаб чиқилган юниформага 2008 йилда бироз ўзгартириш киритилган. Арабларнинг анъаналарига хос элементни ўзида мужассам қилган образ Британиянинг Simon Jersey бренди томонидан ишлаб чиқарилган. Ундаги асосий деталь бош кийим ва унга уланиб, елканинг бир қисмига ташланадиган рўмол ҳисобланади. Emirates вакилларининг айтишича, форма хизмат кўрсатишнинг юқори даражаси ва авиакомпаниянинг тажрибасига урғу бериши, шунингдек, экипаж аъзолари учун қулай ва тезкор ҳаракатланиши учун ўнғай бўлиши керак.

Qantas Airlines

Фото: Marie Claire

Австралиянинг Qantas авиакомпанияси ишчиларининг кийими дунёдаги энг яхши формалардан бири саналади. Образни келиб чиқиши австралиялик бўлган, Мартин Грант бренди асосчиси Мартин Гранг томонидан ишлаб чиқилган кийимни расмий тақдимотда Victoria’s Secret модели Миранда Керр намойиш қилган.

Air France

Фото: Marie Claire

Мода ватанларидан бири бўлган — Франция авиакомпаниясининг формаси ўзига хос ва башанг бўлмаслиги мумкин эмас эди. 60 йилларда Balenciaga ва Dior брендлари томонидан ишлаб чиқилган бўлса, 2006 йилга келиб бу масъулиятли вазифани дизайнер Кристиан Лакруа ўз зиммасига олган. Асос сифатида қора рангдан фойдаланган дизайнер, капалак шаклидаги белбоғ ва қўлқоп учун ёрқин қизил рангни танлашни афзал билган.

Qatar Airways

Фото: Marie Claire

Қатар авиакомпанияси ходимларининг либоси эса Olino компанияси томонидан ишлаб чиқилган. Тўқ қизил ва кул ранг ранглардаги либос бир вақтнинг ўзида оддий, аммо шу билан бирга башанг кўрсатади. Аёллар учун юбка ва шим тақдим қилинган бўлиб — парвоз давомида қай бирида ҳаракатланиш қулайлигини ходимнинг ўзи танлайди. Агар юбка танланса, у тиззадан тушиб туриши ва ҳаддан ортиқ тор бўлмаслиги керак. Шунингдек, икки хил: пошнали ва қулай пойабзал қўшиб берилади.

Turkish Airlines

Фото: Marie Claire

Туркия авиакомпанияси стюардессаларининг либоси устида Истанбулнинг гўзаллиги ва серқирра эканидан илҳомланган миланлик дизайнер Этторе Биллотта ишлаган. У образ яратишда анъанавий каллиграфия ва мозаикаларни рўмол ва бўйинбоғда мужассам этишга уринганини таъкидлаган. Кул ранг ва тўқ қизил рангдаги либос комплекти: шляпа, қўлқоп, рўмол, костюм, сумка ва аксессуарларни ўз ичига олади.

Virgin Atlantic

Фото: Marie Claire

Экипаж аъзоларининг кийими дизайнер Вивен Вествуд томонидан ишлаб чиқилган. 1940 йиллар француз тенденцияларидан илҳомланиб яратилган форманинг аёллар учун мўлжалланган вариантига 2005 йилда ҳошияли, оқ кофта қўшилган. Стюардессалар кофтани плиссировкали юбка ичига киргизиб, устидан бел қисмига урғу берилган жакет кияди. Эркаклар формаси эса Севил-Роу услубидаги костюм шимдан иборат. Қолаверса, юниформа экологик талабларга ҳам жавоб беради. Полиестер учун ип қайта ишланган пластик идишлардан ишланади.

American Airlines

Фото: Marie Claire

American Airlines ходимларининг классик ва оддий формаси Аmericа West Airlines ва US Airways қўшилганидан кейин янгиланган. Аслида ундан аввалроқ, 2016 йилда 80 йиллардаги образга ўзгартириш киритишга қарор қилинган. Аммо бир неча ойдан кейин ишчилар бош оғриши, тошма тошиши ва безовталикдан шикоят қилган. Шундан кейин Lands End томонидан янги кийимлар ишлаб чиқилган. Барча деталлар: ип, тугмача, замок ва бошқаларда хавфли кимёвий моддалар ишлатилмаслигига эътибор берилган. Шундан кейин форманинг ранги кул рангдан тўқ кўк рангга ўзгарган. Урғу сифатида эса қизил рангдан фойдаланилган.

Singapore Airlines

Фото: Marie Claire

Сингапур авиакомпанияси ходимларининг образи эса 50 йилдан буён деярли ўзгармаган. Француз дизайнери Пьер Балмен томонидан 1968 йилда тақдим қилинган либос устида ишлаш давомида қулайлик билан бирга анъанавийликка урғу беришга эътибор қаратилган. Униформа саронг кебая — миллий костюми мотиви асосида яратилган. Асос учун Пьер миллий нақш тушилган Малайзиянинг батикли матосидан фойдаланган.

China Eastern Airlines

Фото: Marie Claire

Француз дизайнери Кристиан Лакруа омонидан ишлаб чиқилган либосда «шанҳайча услуб», европача бичим ва француз модасининг таъсирини кўриш мумкин. Асос сифатида тўқ кўк матодан фойдаланган Лакруа, қизил ранг билан образга урғу беришга ҳаракат қилган.

Virgin Australia

Фото: Marie Claire

«Подиум лойиҳаси» шоуси ғолиби Жули Грбак томонидан ишлаб чиқилган Virgin Australia формаси 2011 йилда расман тақдим қилинган. Алвон ва сиёҳрангнинг умумлаштирилгани компания ходимларининг, ҳатто узоқдан ҳам кўзга ташланиб туришига сабаб бўлади. Дизайнернинг айтишича, формани тикиб битириш учун атиги 7 ой вақт кетган.