Интернетда Германиянинг Леверкузен шаҳрида Audi’га тегишли дилерлик марказларидан бирининг биринчи қаватидан туриб олинган видео тарқалди. Ролик муаллифи кучли ёғингарчилик сабаб юзага келган сув тошқинлари оқибатида янги автомобилларга етган зарарни камерага муҳрлаган, деб хабар беради Motor.

Фото: Facebook / Roberto Ciulla

Сув тошқинидан кейин тасвирга олинган кадрларда Леверкузендаги Audi дилерлик марказининг биринчи қавати намойиш этилган. Кучли ёғингарчилик сабаб ўнлаб янги автомобиллар сув остида қолган. Бундан ташқари, баъзи машиналар «сузиш» вақтида тўқнашувлар содир этган, айримлари эса том маънода бир-бирининг капоти устига чиқиб кетган.

Сув остида қолган моделлар орасида Audi Q3, Q5 ва Q8, шунингдек, RS Q3 Sportback ва RS6 универсали бор. Шу билан бирга, Германиянинг деярли бутун ғарбий қисмини босган сув оқибатида e-tron, e-tron Sportback ва e-tron GT электромобиллари чўкиб кетган.

Европанинг марказий қисмидаги сув тошқинлари ҳафта ўрталарида узоқ давом этган ёмғирлар туфайли бошланди. Германиянинг Шимолий Рейн — Вестфалия ва Рейнланд-Пфальц ўлкаларида дарёлар ўзанидан чиқиб, шаҳарларни сув остида қолдирди, ҳудудлар электрдан узилиб қолди. Сув тошқинидан қўшни Нидерландия ва Бельгия ҳам жабрланди. Полиция маълумотларига кўра, Германия ғарбида юз берган сув тошқинлари оқибатида ҳалок бўлганлар сони 156 кишига етган. Шимолий Рейн — Вестфалия федерал ўлкасида камида 45, Рейнланд-Пфальцда эса 110 киши ҳалок бўлган.