Самарқанд вилояти Паст Дарғом туманида фуқаро фарзандини даволашга келмаган навбатчи шифокорларни калтаклагани ҳақида хабар берилганди. Соғлиқни сақлаш вазирлиги матбуот хизмати хабар қилишича, ушбу фуқарога нисбатан қамоққа олиш эҳтиёт чораси қўлланилган.
Қайд этилишича, «Қўшқудуқ» маҳалласида яшовчи фуқаро Х.М. 15 июль куни соат 22:30 ларда тиббий ёрдам бўлимига маст ҳолда келади ва 22 ёшли ўғли М.Ж. бетоб эканлигини айтиб, шу куни ўз навбатчилигини ўтаётган шифокор Т.Ф. ва фельдшер Н.И.лардан тезда унинг яшаш манзилига боришини айтади. Бироқ бемор манзилига отланган тиббиёт ходимлари биринчи ёрдам қутисини олишга улгурмасдан телефон орқали бошқа бир манзилдан чақирув бўлади.
Навбатчи фельдшер Н.И. телефон орқали чақирувни расмийлаштириш вақтида фуқаро Х.М. бетоқатлик билан фельдшер Н.И.ни ҳақоратлаб, унга қўл кўтаради. Сўнг калтакланган фельдшерни иш жойида қолдириб, шифокор Т.Ф.ни машинасига ўтиришга мажбурлайди.
Яшаш манзилига боргач, хуморидан чиқмаган фуқаро арзимаган баҳоналар билан шифокорни ҳам ҳақорат қила бошлайди. Бунга ҳам қаноат қилмаган «муштумзўр» тез тиббий ёрдам бўлими шифокори Т.Ф.ни хизмат вазифасини ўтаётган вақтда аёвсиз калтаклайди.
Шундан сўнг шифокор Т.Ф. зудлик билан Паст Дарғом туман тиббиёт бирлашмасининг травматология бўлимига олиб келинган.
Тиббий текширув давомида 1988 йилда туғилган шифокор Т.Ф.га бош мия жароҳати, жумладан, бош мия чайқалиши, пастки лаб ички юзасида уриб йиртилиши ҳамда кўкрак қафаси юмшоқ тўқималарининг лат ейиши ташхиси қўйилган. Айни пайтда унга шифокорлар томонидан стационар шароитда зарур тиббий муолажалар кўрсатилмоқда.
Шунингдек, 1978 йилда туғилган навбатчи фельдшер Н.И.га бурун суягининг ёпиқ синиши каби жароҳатлар билан туман тиббиёт бирлашмасида тиббий ёрдам кўрсатилди.
Тиббиёт ходимларига тажовуз қилган фуқаро Х.М.га нисбатан эса қамоққа олиш тарзидаги эҳтиёт чораси қўлланилди ва ҳозирда мазкур ҳолат юзасидан туман ҳуқуқ тартибот идоралари томонидан терговга қадар текширув ишлари олиб борилмоқда.
«2021 йил 1 март куни Республика шошилинч тиббий ёрдам илмий маркази Жиззах филиали тез тиббий ёрдам шифокори Х.М.га хизмат вақтида фуқаро Д.О. томонидан қилинган тажовуз учун 2021 йил 16 мартдаги суд ҳукмига кўра, Жиноят кодексининг 104-моддасининг тегишли қисми билан 5 йил озодликдан маҳрум этиш жазоси тайинланган ва ҳозирда фуқаро Д.О. жазо муддатини ўтамоқда», — дея эслатилган ССВ хабарида.
Бундан аввал Жиззахда чақирув бўйича етиб келган шифокор хонадон эгасининг ўғли томонидан калтаклангани, Самарқандда шифохона қоровули ва шифокорини урган шахсга нисбатан жиноят иши қўзғатилгани ҳамда Фарғонада тез ёрдам ходимларини калтаклаган шахс қамоққа олингани ҳақида хабар берилганди.
Изоҳ (0)