Samarqand viloyati Past Darg‘om tumanida fuqaro farzandini davolashga kelmagan navbatchi shifokorlarni kaltaklagani haqida xabar berilgandi. Sog‘liqni saqlash vazirligi matbuot xizmati xabar qilishicha, ushbu fuqaroga nisbatan qamoqqa olish ehtiyot chorasi qo‘llanilgan.
Qayd etilishicha, “Qo‘shquduq” mahallasida yashovchi fuqaro X.M. 15-iyul kuni soat 22:30 larda tibbiy yordam bo‘limiga mast holda keladi va 22 yoshli o‘g‘li M.J. betob ekanligini aytib, shu kuni o‘z navbatchiligini o‘tayotgan shifokor T.F. va feldsher N.I.lardan tezda uning yashash manziliga borishini aytadi. Biroq bemor manziliga otlangan tibbiyot xodimlari birinchi yordam qutisini olishga ulgurmasdan telefon orqali boshqa bir manzildan chaqiruv bo‘ladi.
Navbatchi feldsher N.I. telefon orqali chaqiruvni rasmiylashtirish vaqtida fuqaro X.M. betoqatlik bilan feldsher N.I.ni haqoratlab, unga qo‘l ko‘taradi. So‘ng kaltaklangan feldsherni ish joyida qoldirib, shifokor T.F.ni mashinasiga o‘tirishga majburlaydi.
Yashash manziliga borgach, xumoridan chiqmagan fuqaro arzimagan bahonalar bilan shifokorni ham haqorat qila boshlaydi. Bunga ham qanoat qilmagan “mushtumzo‘r” tez tibbiy yordam bo‘limi shifokori T.F.ni xizmat vazifasini o‘tayotgan vaqtda ayovsiz kaltaklaydi.
Shundan so‘ng shifokor T.F. zudlik bilan Past Darg‘om tuman tibbiyot birlashmasining travmatologiya bo‘limiga olib kelingan.
Tibbiy tekshiruv davomida 1988-yilda tug‘ilgan shifokor T.F.ga bosh miya jarohati, jumladan, bosh miya chayqalishi, pastki lab ichki yuzasida urib yirtilishi hamda ko‘krak qafasi yumshoq to‘qimalarining lat yeyishi tashxisi qo‘yilgan. Ayni paytda unga shifokorlar tomonidan statsionar sharoitda zarur tibbiy muolajalar ko‘rsatilmoqda.
Shuningdek, 1978-yilda tug‘ilgan navbatchi feldsher N.I.ga burun suyagining yopiq sinishi kabi jarohatlar bilan tuman tibbiyot birlashmasida tibbiy yordam ko‘rsatildi.
Tibbiyot xodimlariga tajovuz qilgan fuqaro X.M.ga nisbatan esa qamoqqa olish tarzidagi ehtiyot chorasi qo‘llanildi va hozirda mazkur holat yuzasidan tuman huquq tartibot idoralari tomonidan tergovga qadar tekshiruv ishlari olib borilmoqda.
“2021-yil 1-mart kuni Respublika shoshilinch tibbiy yordam ilmiy markazi Jizzax filiali tez tibbiy yordam shifokori X.M.ga xizmat vaqtida fuqaro D.O. tomonidan qilingan tajovuz uchun 2021-yil 16-martdagi sud hukmiga ko‘ra, Jinoyat kodeksining 104-moddasining tegishli qismi bilan 5 yil ozodlikdan mahrum etish jazosi tayinlangan va hozirda fuqaro D.O. jazo muddatini o‘tamoqda”, — deya eslatilgan SSV xabarida.
Bundan avval Jizzaxda chaqiruv bo‘yicha yetib kelgan shifokor xonadon egasining o‘g‘li tomonidan kaltaklangani, Samarqandda shifoxona qorovuli va shifokorini urgan shaxsga nisbatan jinoyat ishi qo‘zg‘atilgani hamda Farg‘onada tez yordam xodimlarini kaltaklagan shaxs qamoqqa olingani haqida xabar berilgandi.
Izoh (0)