Ўзбекистон Президенти Шавкат Мирзиёев 15 июль куни мамлакатда расмий ташриф билан бўлиб турган Хитой Давлат кенгаши аъзоси, ташқи ишлар вазири Ван Ини қабул қилди. Бу ҳақда давлат раҳбари матбуот хизмати хабар берди.
Таъкидланишича, учрашувда Ўзбекистон ва Хитой ўртасидаги дўстлик ва ҳар томонлама стратегик шериклик муносабатларини янада мустаҳкамлашнинг долзарб масалалари кўриб чиқилган.
Вазир Ван И Ўзбекистон Президентига Хитой раиси Си Цзиньпиннинг саломи ва энг эзгу тилакларини етказган. Ўзбекистоннинг Марказий ва Жанубий Осиё боғлиқлигини ривожлантириш борасидаги ташаббуси юксак баҳоланган ва қўллаб-қувватланган, Тошкент шаҳрида ўтказиладиган конференция муваффақиятли бўлишига ишонч билдирилган.
«Учрашувда олий даражада эришилган келишувларни амалга ошириш, жумладан, савдо-иқтисодий, инвестициявий, молиявий-техник, маданий-гуманитар соҳалар ва кўп қиррали ҳамкорликнинг бошқа йўналишларида қўшма дастур ва лойиҳаларни илгари суриш масалаларига алоҳида эътибор қаратилди. Пандемияга қарши курашда яқиндан ҳамкорликни давом эттириш муҳим экани таъкидланди», — дейилади хабарда.
Халқаро кун тартиби, шу жумладан, Афғонистондаги вазият юзасидан фикр алмашилган.
Эслатиб ўтамиз,15—16 июль кунлари Тошкентда «Марказий ва Жанубий Осиё: минтақавий ўзаро боғлиқлик. Таҳдидлар ва имкониятлар» халқаро конференцияси бўлиб ўтади. 14 июль куни Туркия ташқи ишлар вазири Мевлут Чавушўғли ушбу конференцияда иштирок этиш учун Ўзбекистонга келган. Шунингдек, Россия ташқи ишлар вазири Сергей Лавровнинг ҳам келиши кутилмоқда.
Мавзуга доир: Афғонистон президенти Ашраф Ғани Ўзбекистонга келди
Изоҳ (0)