Toshkentda 15—16-iyul kunlari bo‘lib o‘tadigan xalqaro konferensiyada ishtirok etish uchun O‘zbekistonga kelayotgan Turkiya tashqi ishlar vaziri Mevlut Chavusho‘g‘li o‘z safarini Farg‘onadan boshlashi haqida xabar berilgan edi. Vazir 14-iyul kuni Farg‘onaga yetib keldi.

Foto: Turizm va sport vaziri matbuot kotibi

Turizm va sport vazirining axborot siyosati masalalari bo‘yicha maslahatchisi Lola Rahmanbayevaning ma’lum qilishicha, uni Farg‘ona shahri xalqaro aeroportida madaniyat vaziri Ozodbek Nazarbekov hamda Turizm va sport vazirining birinchi o‘rinbosari Ulug‘bek Azamov kutib oldi. Tashrif davomida ularga, shuningdek, ikki tomonning favqulodda va muxtor elchilari hamrohlik qilmoqda.

Mevlut Chavusho‘g‘li Farg‘onada Marg‘ilondagi Hunarmandlar markazi, Qo‘shtepa tumanidagi qovunchilik dalalari, Qo‘qondagi Xudoyorxon saroyi hamda Jome majmuasi bilan tanishadi. Shu kuni kechqurun Mevlut Chavusho‘g‘li Farg‘onaga tashrifini yakunlab, “Markaziy va Janubiy Osiyo: mintaqaviy bog‘liqlik. Tahdidlar va imkoniyatlar” mavzusidagi xalqaro konferensiyada ishtirok etish uchun Toshkentga uchib ketadi.

Ushbu xalqaro konferensiyada Afg‘oniston va Pokiston prezidentlari, shuningdek, Yevropa ittifoqining tashqi ishlar va xavfsizlik siyosati bo‘yicha oliy vakili, Yevrokomissiya vitse-prezidenti Jozef Borrel, 20 dan ziyod mamlakat tashqi ishlar vazirlari, nufuzli xalqaro va mintaqaviy tashkilotlar rahbarlari ishtirok etishi kutilmoqda. Ishtirokchilarning umumiy soni 600 dan ortiq.

Forumning asosiy maqsadi Markaziy va Janubiy Osiyo davlatlari o‘rtasidagi tarixan yaqin va do‘stona aloqalarni, ishonch va yaxshi qo‘shnichilikni ikki mintaqa xalqlari va mamlakatlari manfaatlari yo‘lida mustahkamlashdan iborat.

Ma’lumot uchun, bu Turkiya tashqi ishlar vaziri Mevlut Chavusho‘g‘lining O‘zbekistonga ikkinchi tashrifi bo‘lib, bundan oldin u 2021-yilning 6—9-martida Xiva, Samarqand, Buxoro va Toshkent shaharlarida bo‘lgan.