Тошкентдаги Амир Темур хиёбонида тартибсизлик келтириб чиқарган россиялик блогер ва унинг кузатувчилари жавобгарликка тортилди

Тошкентдаги Амир Темур хиёбонида россиялик блогерни кўриш учун юзлаб фуқаролар тўплангани, Миллий гвардия ва ИИБ ходимлари оломонни тарқатиб юборганди. Пойтахт ИИББнинг маълум қилишича, Субо номи билан танилган блогер Субхан Мамедов ҳамда унинг кузатувчилари карантин қоидаларини бузгани учун жавобгарликка тортилган.

Маълум қилинишича, 13 июль куни соат 22:30 ларда Тошкент шаҳрига Instagram ва YouTube ижтимоий тармоқларида Субо номи билан танилган блогер – 22 ёшли Россия фуқароси Субхан Мамедов ташриф буюрган. Бундан олдинроқ у ўзининг саҳифасида тез орада Тошкентда бўлишини ва обуначилар билан учрашиб, уларга пул тарқатишини маълум қилган.

Шу сабабли пойтахтнинг Амир Темур хиёбонида Субони кутиб олиш учун 150-200 га яқин фуқаро йиғилган.

Ички ишлар бош бошқармаси хабар беришича, Субхан Мамедов билан профилактик суҳбат ўтказилган ва воқеада ҳеч қандай қонунбузарлик қайд этилмаган. Шундан сўнг, Миллий оммавий ахборот воситаларини қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов воқеага муносабат билдириб, қонун маҳаллий блогерга ҳам, хорижий блогерга ҳам баробар бўлиши кераклигини таъкидлади.

«У билан профилактик суҳбат эмас, балки унга нисбатан ёлғон маълумот тарқатиб, жамоат тартиби ва соғлиғига хавф туғдиргани, йиғилишлар ўтказиш тартибини бузгани нуқтаи назаридан ҳуқуқий баҳо берилиши керак. Қонун маҳаллий блогерга ҳам, хорижий блогерга ҳам баробар бўлиши керак. Тартиббузарларни бундай эҳтиром ила яна кузатиб қўяверсак, эртага ўзимизга қийин бўлади», – деб ёзади Комил Алламжонов.

Тошкент шаҳар ИИББ томонидан берилган қўшимча маълумотга кўра, ўтказилган дастлабки текширув натижасида 26 нафар фуқаро (шу жумладан, Субхан Мамедов ва унинг кузатувчилари) карантин қоидаларига зид равишда жамоат жойида тиббий ниқобсиз бўлгани учун Маъмурий жавобгарлик тўғрисидаги кодекснинг 54-моддасига асосан маъмурий жавобгарликка тортилган. Шунингдек, 83 нафар фуқарога нисбатан ҳужжатлар расмийлаштириш жараёнида 9 нафар вояга етмаган шахсларнинг ота-онаси билан профилактик суҳбат ўтказилиб, огоҳлантирилган. Таъкидланишича, ҳозирда суриштирув ишлари давом этмоқда.