Қирғизистоннинг Ўзбекистон билан чегарадош ҳудудларида кутилаётган маҳаллий ёмғирлар ҳисобига 15—16 июль кунлари Андижон, Наманган ва Фарғона вилоятларининг тоғ олди ва тоғли ҳудудларида сел келиши хавфи мавжуд, деб хабар бермоқда «Ўзгидромет».
Эслатиб ўтамиз, 13 июль куни Қирғизистон ҳудудида кучли ёмғир ёғиши оқибатида Наманган вилоятининг Косонсой туманига сел келганди. Ҳодиса оқибатида 8 киши ҳалок бўлди, 6 киши тан жароҳати олган.
«Ўзгидромет» мазкур ҳолат юзасидан маълумот берди.
Маълум қилинишича, 13 июль куни Қирғизистоннинг шимоли-ғарбий қисми ва Қозоғистон жанубидан атмосфера совуқ фронти ўтди. Куннинг иккинчи ярмида фронт ўтиши ортидан Фарғона водийси тоғ ҳавзаларида кучли ёмғирли тўп-тўп булутлар ривожланди.
Қирғизистоннинг Жалолобод вилояти Оқсув ва Олабуқа туманларида маҳаллий вақт билан 12:35 ва 13:25 оралиғида кучли жала ёмғирлар ёғиб ўтган. Кучли жала ёмғирлар Жалолобод вилояти Оқсув тумани ва Наманган вилояти Косонсой туманидан оқиб ўтувчи Косонсой сойида сел оқимини ҳосил қилган.
Наманган вилояти Косонсой тумани айрим ҳудудларида қисқа муддатли жала ёмғирлари ва дўл ҳодисаси кузатилган. Қўшимча қилинишича, ўртача ҳисобда дўл диаметри 1 сантиметрни ташкил этган.
«Косонсой тумани тоғ олди ҳудуд ҳисобланиб, географик жойлашганлигига кўра, сел тошқинлари ҳосил бўлишига мойил ҳудуд саналади. 13 июль куни қўшни Қирғизистон ҳудудларида кузатилган кучли жала ёмғирлар ҳисобига шаклланган Косонсой сойидаги сел ҳодисалари олдинлари туманнинг бошқа сойларида ҳам тез-тез такрорланган», — дейилади хабарда.
Қайд этилишича, 13 июль куни Косонсой сойидан максимал 60 м³/с миқдордаги сел-сув тошқини ўтган. Бу Косонсой сойи учун максимал миқдор эмас. Косонсой сойида сел ҳодисалари 1878 йилдан бошлаб рўйхатга олиб келинади. Сойда сел ҳодисалари, асосан, апрель—июль ойларида ҳосил бўлади. Косонсой сойида тез-тез сел ҳодисалари кузатилган бўлиб, 1964 йил 27−28 июль кунлари — секундига 278 кубометр, 1988 йил 10 майда — секундига 200 кубометр, 1992 йил 25 майда — 250 кубометрни ташкил этган.
«Ўзгидромет» аҳолини 14—17 июль кунлари Қирғизистон билан чегарадош бўлган ҳудудлардаги дам олиш масканларига бормасликка чақирган.
Бундан аввал Наманган вилояти ИИБ ҳам дўл ва сел сабаб аҳолини қатор туманлардаги дам олиш масканларига вақтинча бормай туришга чақирганди.
Изоҳ (0)