Қашқадарё вилоятининг Яккабоғ туманида фаолият юритувчи блогер — Элмурод Одиловнинг конституциявий тузумга тажовузда гумон қилинишига туман ҳокими ўринбосари Сарвар Авлаевнинг аризаси асос бўлгани маълум бўлди. Бу ҳақда вилоят ИИБ ахборот хизмати маълум қилди.
Таъкидланишича, Яккабоғ тумани ҳокимининг Маҳалла ва оилани қўллаб-қувватлаш масалалари бўйича ўринбосари Сарвар Авлаев 2021 йилнинг 1 июль куни туман ИИБ бошлиғига ариза ёзиб, «Элмурод блогер» тахаллуси билан фаолият юритувчи фуқаро Элмурод Одилов ҳамда унинг шериги Ш.С.лар ижтимоий тармоқларга Яккабоғ тумани ҳокимлиги раҳбариятини обрўсизлантиришга қаратилган видеоматериаллар чиқараётганини билдириб, уларга нисбатан қонуний чора кўришни сўраган.Мазкур ҳолат Яккабоғ туман ИИБ навбатчилик қисмида белгиланган тартибда қайд этилган.
«Мазкур ҳолат бўйича Яккабоғ туман ИИБ ҳузуридаги тергов бўлими терговчиси капитан Дилшод Поёнов томонидан терговга қадар текширув ҳаракатлари олиб борилмоқда. Шу сабаб Яккабоғ туманида истиқомат қилувчи ‘Элмурод блогер’ тахаллуси остидаги фуқаро Элмурод Одилов ҳамда Яккабоғ туманида яшовчи Ш.С. туман ИИБ ҳузуридаги Тергов бўлимига таклиф этилган», — дейилади бошқарма расмий муносабатида.
Эслатиб ўтамиз, аввалроқ Яккабоғ туманида «Элмурод блогер» тахаллуси остида фаолият юритувчи блогер Элмурод Одиловдан туман ИИБ тушунтириш хати олгани, блогернинг таъкидлашича, бунга туман ҳокими Лутфиддин Абдуллаев ва унинг ўринбосарлари томонидан қилинган шикоят сабаб бўлгани хабар берилганди. «Дарё» мухбири билан суҳбатлашган Элмурод Одилов «Менга қарши 10 га яқин айблов қўйилмоқда, улар орасида конституциявий тузумга тажовуз қилиш каби жиддий айбловлар ҳам бор. Терговчи икки ой давомида мени чақириб, тергов қилишини айтди», деганди.
Изоҳ (0)