Ижтимоий тармоқларда Олмазор туманидаги дўконлардан бирининг олдида жанжал акс этган видеотасвир тарқалди. Тошкент шаҳар ИИББ ахборот хизмати ҳолат бўйича маълумот берди.
Маълум қилинишича, 10 июль куни соат 17:05 ларда Тошкент шаҳар Олмазор тумани Уста Олим кўчасидаги автобус бекатида жойлашган дўконнинг олдида номаълум шахслар ҳеч бир сабабсиз 26 ёшли Қ.Б.ни уриб тан жароҳати етказган. Оқибатда Қ.Б. олган тан жароҳатлари билан касалхонага ётқизилган.
Мазкур жиноятга алоқадор шахслар тезкорлик билан аниқланган. Ҳолат юзасидан Жиноят кодексининг 277-моддаси 2-қисми «а», «б» бандлари (безорилик, бир гуруҳ шахслар томонидан баданга ўртача оғир шикаст етказиш) билан Р.С. ва бошқаларга нисбатан жиноят иши қўзғатилган. Ҳозирда тергов ҳаракатлари давом этмоқда.
«Шуни алоҳида таъкидлаш керакки, айрим фуқароларнинг ҳуқуқий билимга эга бўлмагани ҳамда жиноят ишини қўзғатишнинг процессуал асослари ва тартибини билмаслиги кўпинча тушунмовчиликларга, видеотасвирга берилган шарҳдаги каби асоссиз айбловларга сабаб бўлмоқда. Шунинг учун биз фуқаролардан бу каби айбловларга шошмасликларини, айниқса, воқеа юз берганига қисқа вақт ўтганини, уларнинг хулосалари хато бўлиши мумкинлигини инобатга олишларини сўраб қоламиз», — дейилади пойтахт ИИББ муносабатида.
Аввалроқ Чироқчида номаълум шахс ҳокимлик биноси олдида бир қизни калтаклагани, Тошкентда маст эркак шифокор аёлни калтаклаб, жиддий жароҳат етказгани, Самарқандда қизининг шаънини булғовчи гап-сўзларни тарқатган эркакни калтаклаган отага нисбатан жиноят иши қўзғатилгани тўғрисида хабар берилганди.
Изоҳ (0)