Қашқадарё вилоятининг Яккабоғ туманида «Элмурод блогер» тахаллуси остида фаолият юритувчи блогер Элмурод Одиловдан туман ИИБ тушунтириш хати олди. Блогернинг таъкидлашича, бунга туман ҳокими Лутфиддин Абдуллаев ва унинг ўринбосарлари томонидан қилинган шикоят сабаб бўлган.
Маълум бўлишича, туман ИИБ терговчиси Дилшод Поёнов блогер билан боғланиб, унинг устидан туман ҳокимлиги шикоят қилгани, ҳокимлик вакиллари блогерни туман ҳокими Лутфиддин Абдуллаевни обрўсизлантиришда айблаётганини маълум қилган.
«Хатда Элмурод блогер ҳар хил ёлғон маълумотлар тарқатиб, туман ҳокимини обрўсизлантирган деяпти. Конституциявий тузумга, давлат ҳокимиятига қарши салбий ҳолатларни тарқатиши туман ҳокимлигини обрўсизлантирмоқда деяпти. Туман ҳокимининг барча ўринбосарлари кўрсатма берган, Элмурод блогерга бундай маълумотлар бермаганмиз деяпти. Шунинг учун бир келиб кетишингиз керак. Сизда бундай материалларни ёзишга асос борми? Ҳолат бўйича тушунтириш хати оламиз. Сиз билан суҳбатлашмасак бўлмайди», — деган туман ИИБ вакили телефон суҳбати вақтида.
Элмурод Одиловнинг таъкидлашича, у чақирилган куниёқ ИИБга борган ва тушунтириш хати ёзиб берган. «Терговчи ‘делo’ни олиб қўйди. Аммо туман ҳокимининг аризасини кўрдим. Менга қарши 10 га яқин айблов қўйилмоқда, улар орасида конституциявий тузумга тажовуз қилиш каби жиддий айбловлар ҳам бор. Терговчи икки ой давомида мени чақириб, тергов қилишини айтди», — дейди Элмурод блогер «Дарё» мухбири билан суҳбатда.
Айни вақтда Яккабоғ тумани ҳокимлиги ахборот хизмати раҳбари Шерзод Ҳасанов блогер Элмурод Одилов устидан ИИБга берилган шикоятлар орасида туман ҳокими Лутфиддин Абдуллаевнинг аризаси йўқлигини маълум қилиб, бу ҳақидаги барча гап-сўзларни «асоссиз миш-мишлар» деб атади.
«Ижтимоий тармоқларда блогер Элмурод Одиловга қарши тергов олиб бориш учун Яккабоғ ҳокими томонидан ички ишлар идораларига хат чиқарилган деган асоссиз, миш-миш гаплар тарқалди. Ҳоким Лутфиддин Абдуллаев томонидан блогерга қарши ҳеч қандай хат чиқарилмаганини маълум қиламиз. Шунингдек, блогерлардан Элмурод Одиловга қарши хат ким томонидан чиқарилганига аниқлик киритиб, хулоса қилишларини сўрардик», — деган у.
Шерзод Ҳасанов «Дарё» мухбири билан суҳбатда Яккабоғ ҳокими блогернинг устидан ҳеч қандай шикоят қилмаслигини, бунинг учун ҳеч қандай асос ҳам йўқлигини таъкидлаб, ҳоким Абдуллаев нафақат блогерлар, балки барча ОАВ ходимлари билан ҳамкорликка тайёрлигини алоҳида таъкидлаб ўтди.
Изоҳ (0)