Марказий банк маълумотларига кўра, Ўзбекистонга 2021 йилнинг январь—июнь ойларида хориждан юборилган пул ўтказмалари ҳажми 3,3 миллиард долларни ташкил этди. Бу 2020 йилнинг мос даврига нисбатан 1,4 баробарга кўп.
Мамлакатга 2021 йил бошидан буён юборилган пул ўтказмалари ҳажми ҳар ой ортиб борган. Январь ойида 427 миллион доллар юборилган бўлса, февралда 463 миллион доллар, март ойида 525 миллион доллар, апрелда 577 миллион доллар, майда 616 миллион доллар юборилган. Июнда эса бу кўрсаткич 720 миллион долларни ташкил этган.
Қайд этилишича, пул ўтказмалари ҳажми ортгани аҳолининг истеъмол ва инвестицион фаоллигини қўллаб-қувватловчи омил бўлиб хизмат қилмоқда. Ушбу омиллар, ўз навбатида, ички валюта бозорида таклиф ҳажмининг барқарор бўлиши ва миллий валюта курси шаклланишида муҳим рол ўйнади.
Жаҳон банки таҳлилчилари иқтисодиётнинг тикланишига меҳнат мигрантлари пул ўтказмалари ҳажмининг ортиши ҳам кўмаклашишини қайд этган.
Изоҳ (0)