Qualcomm’нинг 1500 долларлик смартфони фойдаланувчилар ҳафсаласини пир қилди — ОАВ

Snapdragon модемлари ва процессорларини ишлаб чиқарувчи Qualcomm Asus билан ҳамкорликда компанияларнинг энг янги технологияларини ўзида мужассам этган янги смартфонни яратди.Smartphone for Snapdragon Insiders номи остидаги қурилма 1500 долларга баҳоланган, деб хабар беради «Korrespondent.net».

Qualcomm гаджет 2021 йил бошларида ташкил этилган ўзининг Snapdragon Insider фан-ҳамжамияти аъзоларига тўғридан-тўғри сотишини эълон қилган.

Таъкидланишича, смартфоннинг техник тавсифи «2021 йилда флагман Android телефонлардан кутиш мумкин бўлган стандартларга мос келади». У Android 11 операцион тизимида ишлайди, тезкор хотираси 16 гигабайт, ички хотираси эса 512 гигабайт, 144 герцли янгиланиш частотасига эга 6,78 дюймли Samsung OLED-экран ва Gorilla Glass Victus ўрнатилган.

The Verge нашри янги қурилмага Snapdragon 888 процессори ўрнатилганига эътибор қаратган, аввалроқ компания анча кучлироқ 888 Plus моделини тақдим этганди.

«Қиммат нарх ва Qualcomm’нинг энг яхши смартфонига айланиш борасидаги ваъдалар ҳисобга олинадиган бўлса, бу Smartphone for Snapdragon Insiders учун ғалати хатолик», — дейилади материалда.

Смартфон сиғими 4000 мА/соатга тенг аккумулятор билан жиҳозланган. Шунингдек, Qualcomm Quick Charge 5 тезкор қувватланиш технологияси мавжуд, бироқ у ҳам тўлиқ эмас: максимал қуввати технология назарий жиҳатдан қодир бўлган 100 ватт эмас, балки 65 ваттни ташкил этади.

Телефонда учта камера мавжуд: Sony IMX686’нинг 64 мегапикселли асосий датчиги, бундан ташқари, сониясига 30 та кадр тезлигида 8К сифатли видеоларни тасвирга олишга қодир 24 мегапикселли фронтал камера. Бироқ унда бир вақтнинг ўзида учта 4К HDR видеооқимини суратга олишни бошқариш ёки 28 мегапикселли учта суратни бирданига олиш имконияти йўқ.

Смартфонга қўшимча равишда Qualcomm наушниклари, Quick Charge 5 қувватлантиргичи, кабеллар жамланмаси ва телефоннинг резинали бампери тақдим этилади.

«Буларнинг барчаси ҳисобга олинган тақдирда ҳам, қурилма турли баҳсларни юзага келтиради — бу каби юқори кўрсаткичларни (балки бундан яхшироқ) арзонроқ қийматда тақдим этишга қодир кўплаб Android телефонлар мавжуд, масалан, OnePlus 9 Pro ёки Galaxy S21 Ultra», — дея қайд этилади мақолада.