Ўзбекистоннинг олтин-валюта захиралари ҳажми бир ойда 1,37 миллиард долларга камайиб, 1 июль ҳолатига кўра 34,14 миллиард долларни ташкил этди. Бу ҳақда Марказий банк маълумотларида келтирилган.
Мамлакат олтин-валюта захиралари июнь ойининг бошларида илк бор рекорд даражада (35 миллиард доллардан) ошганидан сўнг пасайди.
«Gazeta.uz»нинг қайд этишича, ўтган ой давомида захиралардаги олтиннинг соф ҳажми 200 минг троя унциясига (тахминан, 6,2 тоннага) кўпайган, аммо унинг қиймати 1,2 миллиард долларга пасайди, чунки ушбу қимматбаҳо металл июнь ойида кескин арзонлади. Хусусан, 31 май куни олтин нархи 1905,7 долларни ташкил этган бўлса, 30 июнга келиб у 7,2 фоизга — 1767,6 долларгача арзонлади.
Хорижий валютадаги захиралар ҳам 141,9 миллион долларга қисқарди.
«Ведомости» маълумотларига кўра, 2020 йилда бўлгани каби, олтин котировкалари тренди унга бўлган инвестиция талабини белгилайди — хусусан, АҚШдаги инвесторлар бунга кўпроқ таъсир кўрсатади. Шу сабабли, АҚШ иқтисодиётининг муваффақиятли тикланиши ва айниқса, Федерал Резерв 16 июндаги йиғилишида таъкидлаганидек, ушбу мамлакатда бандликнинг ўсиши кутилаётгани, хатарларнинг пасайишини ва натижада ҳимоя активларига талабнинг пасайишини кўрсатди.
Изоҳ (0)