Самарқанд вилояти Иштихон шаҳрига кириб боришда 6 туп заранг ва 2 туп шумтол дарахтини кесган уч нафар фуқаро жавобгарликка тортилди. Бу ҳақда Экология ва атроф-муҳитни муҳофаза қилиш давлат қўмитаси матбуот хизмати хабар берди.
Фото: Экология ва атроф-муҳитни муҳофаза қилиш давлат қўмитаси
Маълум қилинишича, 7 июль куни йўл ёқасидаги заранг ва шумтол дарахтлари «Ғафур Ғулом» маҳалласида яшовчи фуқаро Ж.У, «Равот» маҳалласида яшовчи фуқаролар М.Д. ва И.К. томонидан ўзбошимчалик билан моторли арра орқали кесиб ташланган.
3 нафар фуқаронинг ҳар бирига нисбатан Маъмурий жавобгарлик тўғрисидаги кодекснинг 79-моддасига (дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) асосан 1 миллион 225 минг сўмдан жарима ҳамда 63,7 миллион сўм табиатга етказилган зарарни қоплаш учун компенсация ҳисобланди.
Ҳозирда мазкур ҳолат юзасидан қўшимча тарзда суриштирув ва ўрганиш ишлари давом эттирилмоқда.
Сурхондарёда 109 туп қимматбаҳо дарахтни ноқонуний кесган масъул ходим жаримага тортилгани, Бекободда ҳовлиси ёнидаги 2 туп чинорни кесган оила 131 миллион сўм зарарни тўлаши, Ўзбекистонда дарахт экиб, парвариш қилмаган мутасадди ташкилотларни жаримага тортиш таклиф қилингани ҳамда Ўзбекистонда тўрт ой давомида 2000 дан зиёд ноқонуний дарахт кесиш ҳолатлари аниқлангани ҳақида хабар берилганди.
