Тошкент вилояти Паркент туманида жойлашган Чотқол қўриқхонасида аномал иссиқ туфайли ёнғин содир бўлди, дея хабар бермоқда Давлат экология қўмитаси матбуот хизмати.
Ўзбекистон Экология ва атроф-муҳитни муҳофаза қилиш давлат қўмитаси таркибидаги Чотқол давлат биосфера қўриқхонасининг денгиз сатҳидан 1500–1700 метр баландликдаги Тераклисой ҳудудида аномал об-ҳаво таъсирида ёнғин чиққан. Бу ҳақда шу атрофда хизмат ўтаётган қўриқхона инспекторлари 2021 йил 5 июль куни ўзларидаги мавжуд алоқа воситалари орқали хабар берган.
Ёнғин ҳудуди кенгайиб кетишининг олдини олиш ва уни бутунлай ўчириш, қолаверса, юриш ва ҳаракатланиш қийин бўлган тоғнинг юқори қисмида ўт чиқишининг сабабларини аниқлаш мақсадида шу куннинг ўзида Фавқулодда вазиятлар вазирлиги, Мудофаа вазирлиги, Миллий гвардия ва Давлат экология қўмитаси томонидан қўшма тадбир ўтказилди.
Қарийб бир гектарни эгаллаган ёнғинда асосан қуриган ўт-ўланлар ёнган, кўп йиллик дарахтларга зарар етишининг олди олинган. 2021- йилнинг 6 июль ҳолатига ёнғин тўлиқ ўчирилиб, қўшма тадбирда қатнашганлар орасида жароҳатланиш қайд этилмади.
Бундан аввал Самарқандда Зарафшон миллий табиат боғининг 1,5 гектар майдони ёниб кетгани, Чинозда ғалладан бўшаган ер майдон ёқиб юборилди. Айбдорга нисбатан 1,2 млн сўм жарима солингани ҳамда Ўрта Чирчиқдаги корхоналарнинг бирида ёнғин чиққани ҳақида хабар берилганди.
Изоҳ (0)