Sog‘liqni saqlash vazirligi 4-iyul holatiga ko‘ra, O‘zbekistonda koronavirus infeksiyasi qayd etilganlarga oid statistikasi bilan bo‘lishdi. Ma’lum qilinishicha, o‘tgan bir sutka ichida mamlakatda yana 475 kishida koronavirus tasdiqlangan va 304 kishi kasallikdan sog‘aygan. Sog‘ayganlar orasida COVID-19 infeksiyasi eng ko‘p qayd etilayotgan Toshkent shahri aholisi yo‘q.
SSV statistikasiga ko‘ra, Toshkent shahrida 1-iyul kuni 80 kishi, 30-iyun kuni 367 kishi, 29-iyun kuni 365 kishi, 28-iyun kuni 352 kishi koronavirusdan tuzalgan. Ammo vazirlik ketma-ket uch kundan buyon poytaxtda COVID-19 infeksiyasidan tuzalgan bemorlarga oid ma’lumotlarni e’lon qilmayapti.
Avvalroq Zangiotadagi kasalxona bemorlar bilan to‘lgani, 2 ming kishiga mo‘ljallangan joyda 2,5 mingdan ortiq bemor davolanayotgani to‘g‘risida xabar berilgandi. Shuningdek, Toshkent shahrida DXX tasarrufidagi “Yoshlik” hamda IIV tasarrufidagi “Universal” sport majmualarida kovid-markaz qaytadan tashkil etilgan.
Mamlakatda kunlik kasallanish holatlari soni yana ortib bormoqda. Shu sababli respublika bo‘ylab 28-iyundan karantin cheklovlari kuchaytirildi. Toshkent shahriga 28-iyundan transport vositalari kirishiga hamda ko‘ngilochar va ovqatlanish obyektlari faoliyatiga cheklovlar o‘rnatildi.
Izoh (0)