Қашқадарё вилоятининг Чироқчи туманида электр таъминотидан норози бўлиб, «Афросиёб» поезди йўлини тўсганларнинг 9 нафарига 15 суткадан қамоқ жазоси тайинланди, дея хабар берди «Дарё» мухбири.
Маълум бўлишича, поезд йўлини тўсганлар ишини кўриб чиққан Жиноят ишлари бўйича Чироқчи туман суди мазкур воқеада 13 нафар кишини айблаб, уларнинг 9 нафарига 15 суткадан қамоқ жазоси тайинлаган бўлса, 4 нафарини базавий ҳисоблаш миқдорининг етти баравари — 1 миллион 715 минг сўмдан жаримага тортган.«Бу аҳволда одамлар муаммоларни ҳам олиб чиқишга қўрқиб қолмоқда. Бизда электр токи масаласи катта муаммо ва шундай муаммолигича қолмоқда. Энди халқ жазога тортилмайлик деб, шундай муаммолар гирдобида яшаверайликми?», — дейди «Дарё» мухбирига бу ҳақда хабар берган аҳоли вакилларидан бири.
Мурожаатчининг айтишича, Чироқчининг Айритом қишлоғида йўлларнинг таъмирталаблиги, электр токи, газ ва ичимлик сув етишмаслиги каби муаммолар ҳамон бор.
Эслатиб ўтамиз, ижтимоий тармоқларда 2021 йилнинг 7 июнь куни эрталаб соат 09:00 дан 10:20 ларга қадар «Қарши минтақавий темир йўл узели» унитар корхонасига қарашли Айритом темир йўл бекати ҳудудида Чироқчи туман Айритом қишлоғи фуқаролари темир йўл устига йиғилгани акс этган видео тарқалганди. Кейинчалик бу воқеага электр таъминотидаги чеклов сабаб бўлгани очиқланди. Мазкур иш бўйича қишлоқнинг 50 нафар фуқаросига чора кўрилгани, шундан 13 нафари судга чақирилгани маълум бўлганди.
Изоҳ (0)