Шавкат Мирзиёев 5 июль, душанба куни Тожикистон президенти Эмомали Раҳмон билан телефон орқали мулоқот қилди, деб хабар бермоқда Президент матбуот хизмати.

Фото: «Дарё» / Мадина Нурман

Хабарга кўра, давлат раҳбарлари Ўзбекистон—Тожикистон муносабатларининг икки томонлама кун тартибидаги долзарб масалаларни кўриб чиқди ҳамда минтақавий ҳамкорлик юзасидан фикр алмашди.

Минтақада Афғонистон йўналишидаги аҳволнинг ёмонлашиши ва кескинликнинг кучайиши билан боғлиқ вазиятнинг ривожланишига алоҳида эътибор қаратилди. Яқин идоралараро мувофиқлашувни давом эттириш муҳим экани таъкидланди.

Президентлар, шунингдек, бўлажак олий даражадаги тадбирларни, шу жумладан, Марказий Осиё давлатлари раҳбарларининг навбатдаги маслаҳат учрашувини ўтказиш режасини кўриб чиқди.

Эслатиб ўтамиз, 23 июнда ҳам Шавкат Мирзиёев ва Тожикистон президенти Эмомали Раҳмон телефон орқали суҳбатлашиб, Афғонистоннинг шимолий ва шимоли-шарқий вилоятларида, икки мамлакатнинг Афғонистон билан давлат чегараси ўтадиган ҳудудлари бўйлаб вужудга келаётган таҳликали вазиятни жуда кескин деб баҳолаганди.

Шавкат Мирзиёев 29 июнь куни Туркманистон президенти Гурбангули Бердимуҳамедов билан телефон орқали мулоқотда Афғонистон чегараолди ҳудудларидаги вазиятнинг ривожланишини муҳокама қилганди.