Жорий йилнинг 2 июль куни «Агробанк» АТБ томонидан Президентнинг «Халқ давлат идораларига эмас, балки давлат идоралари халқимизга хизмат қилиши керак» ғояси асосида, давлат ва жамият ҳаётидаги муҳим масалалар бўйича ўтказиладиган брифинг ва матбуот анжуманлари режасига мувофиқ, Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги мажлислар залида «‘Агробанк’да очиқлик ва холислик» мавзусига бағишланган матбуот анжумани ўтказилди.
Унда «Агробанк» АТБ бош офисининг раҳбар ва ходимлари ҳамда оммавий ахборот воситалари вакиллари иштирок этди.
Матбуот анжуманида таъкидланганидек, банк томонидан тадбиркорларнинг бизнес лойиҳаларини молиявий қўллаб-қувватлаш, аҳолини тадбиркорликка кенг жалб қилиш ҳамда аҳоли ва банк мижозлари томонидан билдирилаётган мурожаатлар ва уларнинг ечими бўйича жорий йилнинг ўтган даврида муайян ишлар амалга оширилди.
Маълумки, Президент Шавкат Мирзиёев томонидан жисмоний ва юридик шахсларнинг мурожаатларини кўриб чиқишда қонун устуворлигини таъминлаш масаласига жиддий эътибор қаратилаётганлиги, айниқса, ҳудудларга бўлган ташрифлар давомида аҳоли ва тадбиркорлар билан мунтазам учрашув ва мулоқотлар қилаётганлиги, уларнинг дардини ва муаммоларини эшитиб, мурожаатларни ҳал этиш юзасидан аниқ чора-тадбирлар қабул қилинмоқда.
«Агробанк» ҳам жисмоний ва юридик шахсларнинг мурожаатлари билан ишлашда белгиланган қонун талаблари асосида фаолият олиб бормоқда. Банк бошқаруви томонидан аҳолининг кенг қатламлари, барча тоифадаги хўжалик юритувчи субъектларнинг банкка нисбатан ишончини янада мустаҳкамлаш, ривожлантириш, уларнинг талаб ва истакларида акс этган масалаларни ижобий ҳал этишга жиддий эътибор қаратилмоқда.
2021 йилнинг ўтган даври давомида банк бошқаруви томонидан «Жисмоний ва юридик шахсларнинг мурожаатлари тўғрисида»ги қонуннинг ижросига алоҳида эътибор қаратилди ва мунтазам муҳокама қилиб борилди.
Таҳлиллар натижасида, ҳисобот даврида келиб тушган мурожаатларнинг 90 фоизи кредит масаласида, шундан 78 фоизи ижтимоий дастурларга асосан имтиёзли шартлар асосида, гаровсиз ва имтиёзли фоизларда кредит ажратиш, 10 фоизи банк хизматлари юзасидан маълумот олиш масаласидаги мурожаатларни ташкил этди.
Аҳоли ва тадбиркорлар билан тўғридан-тўғри мулоқот қилиш мақсадида «‘Агробанк’ раисига мурожаат» Telegram ва Facebook ижтимоий тармоқлари ишга туширилган. Шунингдек, тизимда ишонч телефонлари ҳамда ягона алоқа маркази (1216) ташкил этилган. Ушбу ишонч телефонлари орқали мижозлардан тушган мурожаатлар қабул қилиниб, қисқа муддатда мурожаатчиларга ҳуқуқий тушунчалар бериб борилмоқда.
Мурожаатлар таҳлили натижасида, кредит масаласида мурожаатларнинг келиб тушишини олдини олиш, уларнинг салмоғини камайтириш ҳамда мижозларнинг кредит буюртмаларини тезлаштириш мақсадида банк томонидан амалга оширилиши лозим бўлган тадбирлар белгилаб олинди. Хусусан, банк мижозларига хизмат кўрсатиш сифати оширилди, улар учун қулай бўлган янги банк хизмат турлари жорий этилди.
Кредитлар ажратиш жараёнини соддашлаштириш ва ортиқча бўғинларни камайтириш мақсадида ваколатлар оширилди. Жумладан, ҳудудий бошқармаларнинг 300 минг АҚШ доллари эквивалентида кредитларни мустақил ҳал этиш, туман филиалларининг эса 50 минг АҚШ доллари эквивалентида бош банк билан қўшимча келишувсиз, мустақил қарор қабул қилиш бўйича ваколатлари белгиланди.
Жорий йил 1 апрелдан «Оилавий тадбиркорликни ривожлантириш» дастури доирасида аризаларни қабул қилиш ягона электрон платформаси ишга туширилиши натижасида, тадбиркорлик билан шуғулланиш истагида бўлган фуқароларда онлайн мурожаат қилиш ва аризанинг ижро бўлиш жараёнларини кузатиш имкони яратилди.
Фермер хўжаликларига хизмат кўрсатишнинг дастурланиши фермер хўжаликлари билан ёқилғи ва минерал ўғитлар етказиб берувчи таъминотчилар ўртасида ҳисоб-китобларни Humo корпоратив кредит карталари орқали бажарилиши, уларнинг банкка келиши, навбат кутишига кетадиган вақтини тежаш имконини берди.
Фермер хўжаликларига янада қулайлик яратиш, уларнинг шикоят ва мурожаатларининг олдини олиш мақсадида бугунги кунда, барча агротехник (12 та) йўналишга тўловни 1 та карта орқали амалга ошириш бўйича тизим ишлаб чиқиляпти. Шунингдек, тадбиркорларнинг кредитдан фойдаланиш имкониятларини кенгайтириш учун револьвер ва экспортчиларга нақд пулда — янги кредит турлари жорий этилди.
Банк мижозлари револьвер кредит туридан фойдаланилганда бир марта кредит ҳужжатлари тақдим этиб, йил давомида кредитдан фойланиши мумкин. Жисмоний шахслар учун «Агро экспресс» миллий валютадаги пул ўтказмалари хизмати жорий этилди. Ушбу хизмат тури орқали ҳудудлараро пул ўтказмаларини амалга ошириш имконияти яратилди.
Шу билан бирга, аҳоли ва мижозларга қулайлик ҳамда замонавий банк хизматларини кўрсатиш мақсадида картомат қурилмаси жойлаштирилди. Бу қурилма орқали дам олиш кунларисиз ва куннинг исталган вақтида, банк ходими иштирокисиз Visa ҳамда Humo пластик карталарини 3 дақиқа ичида муомалага чиқариш имконияти яратилди.
Бундан ташқари, Agrobank mobile иловаси орқали ТТТ (Тезкор тўлов тизими) хизмати йўлга қўйилган бўлиб, ушбу хизмат орқали юридик шахслар куннинг исталган пайтида, 24/7 режимида тўлов топшириқномаларини амалга ошириш имконияти ҳамда Visa халқаро пластик карталарига янги пароль ўрнатиш, CVV кодларини смс орқали олиш имконияти яратилди.
Аҳоли ва мижозларга қулайлик яратиш мақсадида, жорий йил май-июнь ойларида банк томонидан жойлаштирилган банкоматлар қайта дислокация қилиниб, ушбу жараёнда 342 дона банкоматлар қўшимча 24/7 шохобчаларига ўрнатилди ва ушбу шохобчалар сони 508 донага етказилди.
Бугунги кунга келиб, Visa—Humo кобейжинг картасини эмиссия қилиш йўлга қўйилиб, кобейжинг карта орқали бир вақтнинг ўзида иккита тўлов тизимининг афзалликларидан фойдаланиш имконияти яратилди. Эндиликда Ўзбекистон ҳамда Visa картаси қабул қилинадиган дунёнинг 200 мамлакатида маҳсулотлар ва хизматлар учун тўловларни автоматик конвертация қилиш орқали амалга ошириш мумкин бўлади.
Ушбу картанинг яна бир қулайлиги — у терминал ва банкомат танламайди. Уни «Агробанк» томонидан ўрнатилган барча турдаги терминал ва банкоматларда ишлатиш мумкин.
Пандемия даврида бутун дунё интернет орқали савдо қилаётган бир пайтда, кобейжинг карта ёрдамида савдо қилиш жуда қулай. Ушбу хизмат мижозларга вақтни ва маблағни тежаш орқали келиб тушаётган кўп сонли мурожаатларнинг камайишига олиб келди. Шунингдек, жисмоний шахслар учун эса мультивалюта пластик картаси жорий этилди. Ушбу хизмат тури орқали битта пластик картага бир вақтда ҳам сўм, ҳам валюта маблағини тўлдириш имконини беради.
Банк бошқаруви томонидан янги банк хизматлари жорий этилиши ва амалга оширилган тадбирлар натижасида, аҳоли ҳамда мижозлардан нақд пул, ҳисоб рақамларидан пул маблағларини ўтказиш, халқаро пул ўтказмалари, пластик карта хизмат тури масаласида мурожаат келиб тушишининг олдини олишга тўлиқ эришилди.
Аҳоли ва банк мижозлари билан юзма-юз мулоқот қилиш мақсадида, банк бошқарув раиси, ўринбосарлари ва вилоят бошқармалари томонидан жорий йилнинг ўтган даври давомида, республиканинг 31 та туман ва шаҳарларида тадбиркорлар билан сайёр учрашувлар ўтказилди.
Мазкур ўтказилган сайёр учрашув давомида мижозлардан 373 та мурожаат келиб тушди. Ушбу мурожаатларнинг 136 таси қаноатлантирилган ва 237 таси бўйича амалдаги меъёрий ҳужжатлар асосида ҳуқуқий тушунтиришлар берилди.
Мухтасар қилиб айтганда, банк томонидан бундан кейин ҳам бу борадаги ишларни янада самарали ташкил этишда жисмоний ва юридик шахсларнинг ҳар бир мурожаатини ўз вақтида, қонунчилик талабларига мувофиқ равишда кўриб чиқилиши юзасидан талабчанликни янада оширади. Ҳудудларда жисмоний шахслар ва юридик шахсларнинг вакиллари билан сайёр қабуллар ўтказиш амалиёти давом эттирилади, муаммоларни жойида ҳал этишга эътибор қаратилади.
Телефонлар: +99871 202 80 08, 11062, 11072
Электрон почта: agrobank-matbuot@umail.uz
Telegram: https://t.me/AgrobankChannel
Facebook: https://www.facebook.com/agrobankuzbekistan
«Агробанк» АТБ матбуот хизмати
Изоҳ (0)