Ўзбекистондаги чорраҳа ва йўлларда радар ва камералар қўйиш жойлари аукцион орқали савдога қўйилиши бошлангани тўғрисида хабар берилганди. «E-auksion» сайтида биринчи бор Тошкент шаҳрида радар ўрнатиладиган жойлар аукционга чиқарилди.

Фото: «Дарё» / Мадина Нурман

Келтирилган маълумотларга кўра, пойтахт кўчаларида радар ўрнатиш мумкин бўлган жойларнинг нархи 2,4—36,5 миллион сўм этиб белгиланган. Хусусан, Бектемир туманида — 7 та, Яккасарой туманида — 16 та, Миробод туманида эса 15 та радар ва камера ўрнатиш жойлари аукционга қўйилган.

Фото: «E-auksion.uz»

Энг арзон жой Яккасарой туманида, энг қиммат жой сифатида эса Миробод тумани Ҳамид Олимжон номидаги майдон яқинидаги кўприк ости кўрсатилган.

Фото: «E-auksion.uz»

Эслатиб ўтамиз, 2020 йил декабрь ойида «Давлат томонидан тартибга солинадиган соҳаларга хусусий секторни жалб этиш бўйича қўшимча чора-тадбирлар тўғрисида»ги Президент қарори қабул қилинганди. Қарорга кўра, махсус автоматлаштирилган фото ва видео қайд этиш дастурий техник воситалари ўрнатиладиган жойларни тадбиркорларга бириктириш электрон аукцион савдолари орқали амалга оширилади.

Бундан аввал Ўзбекистонда тадбиркорларнинг радар ўрнатишига рухсат бериладиган ҳудудларнинг аукцион нархлари эълон қилингани ҳамда Ўзбекистонда «парковка» қоидаларини бузганлик учун жарима миқдори қанчага пасайтирилаётгани ҳақида хабар берилганди.