Дунё бўйлаб саёҳат қилишга ундайдиган 7 та ажойиб қаҳвахона (фото)

Ҳамма ишингизни ташлаб, саёҳат қилишга илҳом берадиган, ноодатий интерьерга эга бўлган қаҳвахоналар ҳақида маълумот берамиз.

Lhong Tou Cafe

Бангкокда жойлашган бу кафеда худди кемадаги каби юқори ёки пастки қаватда ўтиришингиз мумкин. Албатта, юқори ўриндиқлар тезда банд қилинади, аммо эрталаб улгурсангиз, яхши столга буюртма беришингиз мумкин.

Romeow Cat Bistrot

Веганча менюга эга бўлган Римдаги ушбу кафе нафақат нафис таомлари туфайли ўзига жалб қилади, балки бу ерда тушлик, нонушта ёки кечки овқат пайтида жуда хотиржам ва эркин юрадиган мушуклар билан бирга ўтиришингиз мумкин.

Art-Café Home

Ажойиб манзара, бетакрор ва ғайриоддий интерьер, витраж деразалар, мазали таомлар, муаллифлик менюси ва унутилмас базмлар — буларнинг барчаси Тбилисидаги Грузия арт-кафесида мужассам, бу жой, шубҳасиз, сизга ёқади.

Majestic Cafe

Порту шаҳрида жойлашган мазкур кафе дунёдаги энг гўзал бинолардан бири ҳисобланади. Дарвоқе, айнан шу ерда Ж.К.Роулинг Гарри Поттер ҳақидаги биринчи китобини ёзишни бошлаган.

Café Florian

Венецияга саёҳат қилганлар, албатта, кириб ўтиши керак бўлган дунёдаги энг қадимий кафелардан бири. Бу кафе турли мамлакатларнинг турфа хил санъат асарлари ва ноёб таомлари билан машҳур.

Arts Club Café

Романтика ва минимализмнинг ҳар қандай эстетикасини севувчилар учун ажойиб жой. Бу ерда қадимий фавворалар манзарасидан завқланиб, қулай диванларда ўтирган ҳолда нонушта қилишингиз мумкин. Меню турли хил қаҳва ва таомларни ўз ичига олади.

Indian Cofee House

Калкуттадаги мазкур қаҳвахона нафақат ажойиб қаҳвалари билан, балки интерьери билан ҳам ҳайрон қолдиради. Бу ерда урф-одатлар сақланиб қолган: официантлар мустамлакачилик давридаги каби бошларига салла ўраб, классик форма кийиб юради. Қаҳвахонанинг эскича дизайни эса кишида ўзгача таассурот қолдиради.