Қашқадарёда кафе, ошхона, чойхоналарнинг соат 22:00 гача ишлашига рухсат берилди

Ўзбекистонда коронавирус инфекцияси билан касалланиш ҳолатлари сўнгги кунларда ортиб бораётгани инобатга олиниб, Республика махсус комиссиясининг қарорига асосланиб, Қашқадарё вилоятидаги тартиб ва чекловларга қўшимчалар киритилди. Бу ҳақда вилоят ҳокимлиги ахборот хизмати раҳбари Аҳрор Содиқов маълум қилди.

Унга кўра, 2021 йилнинг 28 июнидан:

• вилоят ҳудудида кўнгилочар объектлар — ресторан, тунги клублар, дискотека, караоке, билярд заллари ва компьютер ўйинлари марказлари ҳамда умумий овқатланиш объектлари — кафе, ошхона, чойхоналарни ишлашига соат 8:00 дан 22:00 гача рухсат берилади;
• кўнгилочар ва умумий овқатланиш объектларида ташриф буюрувчиларга ушбу муассасаларнинг умумий сиғимининг 50 фоизидан қатъий оширмаган ҳолда хизмат кўрсатади;
•  супермаркет ва бошқа йирик дўконларнинг кириш-чиқиш жойларини пирометрлар, дезинфекцион «тўшаклар» ва антисептик воситалари билан жиҳозланиб, уларга киришда ҳар бир фуқаронинг тана ҳароратини ўлчаб, 37C ва ундан юқори бўлган ёхуд инфекция аломатлари мавжуд бўлган ҳолатда киритмаслик, ижтимоий масофани сақлаш, тиббий ниқобда бўлиши таъминланади;
• барча бозорлар — деҳқон ва буюм бозорлари, пиширилган таомлар билан савдо қилувчи бозорлар, кунлик бозорлар, қурилиш моллари билан савдо қилувчи бозорлар, автомобиль ва улгуржи бозорлар ҳафтанинг бир кунини санитар-тозалаш учун ёпишни шахсан назоратга олади;
• кунлик ва жума намозларини фақат масжиднинг очиқ ҳаводаги майдонларида (очиқ айвонлар, масжид ҳовлиси, масжидга туташ ички кўчалар) тиббий ниқобда бўлиш ва оралиқ масофани сақлаган ҳолда ташкил этилади;
• коронавирус инфекцияси билан касалланган беморлар ва ушбу инфекциясини юқтирганликда гумон қилинган шахсларга қўшимча қулайликлар яратиш мақсадида Қарши шаҳридаги «Шўртан газ кимё мажмуаси» МЧЖ балансидаги «Геолог» спорт мажмуасида ташкил этилган COVID-19 тақсимлаш маркази фаолияти қайта тикланади.

Эслатиб ўтамиз, Ўзбекистонда 28 июндан карантин чекловлари кучайтирилди. Унга кўра, республика бўйлаб кўнгилочар объектлар – ресторан, тунги клуб, дискотека, караоке, билярд заллари ва компьютер ўйинлари марказлари ҳамда умумий овқатланиш объектлари – кафе, ошхона, чойхоналарнинг ишлашига соат 08:00 дан 20:00 гача рухсат берилган.

Қашқадарё вилояти махсус комиссиясининг 28 июнь куни ўтказилган йиғилишида воҳадаги коронавирус билан боғлиқ вазият ва Республика махсус комиссиясининг қабул қилинган қарорини жорий этиш масалалари кўриб чиқилганди. Муҳокамада вилоят раҳбарининг воҳа аҳлига йўллаган мурожаати юзасидан аҳоли томонидан қолдирилган изоҳларга ҳам эътибор қаратилган. Зоир Мирзаев 300 нафардан ортиқ фуқаро мурожаат юзасидан таклифлар билан чиққанини, вилоятдаги иқлимни ҳисобга олиб, овқатланиш объектларининг иш вақтини соат 22:00-23:00 га қадар узайтириш таклифи ҳам кўп тушганини айтганди.

«Воҳадошларимиз таклифларини инобатга олиб, умумий овқатланиш объектлари — кафе, ошхона, чойхоналарнинг ишлашига соат 08:00 дан 22:00 гача рухсат берилишини таклиф қиламан», — деган эди Зоир Мирзаев.