Наманган ва Самарқанд вилоятида ноқонуний равишда ер сотиш ҳолатлари аниқланди

Наманган ва Самарқанд вилоятларида фуқароларнинг фирибгарлик йўли билан ер сотиш ҳолатлари аниқланди, дея хабар бермоқда Бош прокуратура ҳузуридаги департамент матбуот хизмати.

Қайд этилишича, департамент ҳамда ДХХнинг Наманган вилояти бошқармалари томонидан ўтказилган тезкор тадбирда, фуқаро А.Н. бошқа бир фуқаро М.нинг ишончига кириб, унга 7 000 АҚШ доллари эвазига Косонсой тумани «Жар» МФЙ ҳудудидан уй-жой қуриш учун танишлари орқали 10 сотих ер майдони ажратиб беришни ваъда қилиб, олдиндан 500 АҚШ долларини олган вақтида ашёвий далиллар билан ушланган.

Худди шундай департамент ҳамда ДХХнинг Ургут тумани бўлимлари томонидан ўтказилган тезкор тадбирда, тумандаги «Н» оилавий корхонаси раҳбари С.Н. бўлган «Ж» агрофирмаси ҳудудидаги лимон етиштиришга ихтисослашган 1,48 гектар ер майдонини фуқаро М.га 12 000 АҚШ долларига фирибгарлик йўли билан сотмоқчи бўлган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.

Бундан аввал Қаршида ҳокимлик захирасида турган бўш ерни 70 млн сўмга сотмоқчи бўлган шахс ушлангани, Самарқанд ва Қаршида ерни ноқонуний равишда сотаётган собиқ мансабдор ва ҳокимлик вакили ушлангани ҳамда Самарқандда ҳокимиятдаги танишлари орқали 40 сотих ерни 19,5 минг долларга сотишга уринган собиқ ИИО ходими қўлга олингани ҳақида хабар берилганди.