Ҳисоб палатасининг 2021 йилдаги назорат ишлари режасига мувофиқ 2017—2020 йилларда ажратилган маблағлардан самарали фойдаланиш бўйича ўтказган ўрганишида 2 та ОТМда 22,5 миллиард сўм ўзлаштирилгани аниқланди. Бу ҳақда палата матбуот хизмати хабар берди.
Қарши муҳандислик-иқтисодиёт институтида ҳисобланган иш ҳақи ва стипендияларга нисбатан банкдан ортиқча олинган 21 миллиард сўм нақд пуллар бухгалтерия ходимлари томонидан қалбаки ведомостларни тузиш орқали ўзлаштирилган.
Жиззах политехника институтида 1,5 миллиард сўм маблағлар пластик карточкага ўтказиш орқали ўзлаштирилган.
Бухгалтерия хизмати масъуллари ўз тушунтириш хатларида юқорида кўрсатилган маблағларни ўзлаштирганларини кўрсатиб ўтган.
Аниқланган ҳолатлар бўйича расмийлаштирилган ҳужжатлар ўзлаштирилган маблағларни ўз жойига тиклаш ва ҳуқуқий баҳо бериш учун белгиланган тартибда Бош прокуратурага юборилган.
Қайд этилишича, айни пайтда Олий ва ўрта махсус таълими вазирлигида назорат тадбири давом эттирилмоқда, якуний маълумотлар бўйича қўшимча ахборот берилади.
Аввалроқ Ўзбекистон Экология қўмитаси ва унинг таркибидаги ташкилотлар 9,4 миллиард сўмлик маблағни ноқонуний сарфлагани аниқлангани, Ўзбекистонда бешта вазирлик 61 миллиард сўмни талон-торож қилишининг олди олингани ҳақида хабар берилган эди.
Изоҳ (0)