Тожикистон Давлат миллий хавфсизлик қўмитаси (ДМХҚ) «Толибон» ҳаракатининг Тожикистон ва Афғонистон ўртасидаги Қундуз вилояти жойлашган «Шерхон-Бандар» назорат ўтказиш пунктига ҳужуми юзасидан изоҳ берди, деб ёзади Asia-Plus. Ҳужум оқибатида афғонистонлик ҳарбийлар яраланган ва ўлдирилган, шунингдек, Афғонистон ҳукумат қўшинларининг 130 дан ортиқ ҳарбий хизматчилари Тожикистон ҳудудига ўтган эди.
Фото: Тожикистон Давлат миллий хавфсизлик қўмитаси
Тожикистон чегара қўшинлари хабар беришича, 21 июнь куни «Толибон» ҳаракатининг қуролланган гуруҳи Афғонистоннинг Қундуз вилоятидаги Шерхон-Бандар чегара комиссариатига ҳужум қилган.
«22 июнь куни 09:00 гача давом этган қуролли тўқнашув оқибатида ҳужумга дош бера олмасдан, Афғонистон Ислом Республикаси ҳукумат қўшинларининг 134 нафар ҳарбий хизматчиси ‘Панж’ чегара отрядининг 3 ва 4-заставалари орқали Тожикистон Республикаси ҳудудига чекинишга мажбур бўлди», — дейилади баёнотда.
Таъкидланишича, тожикистонлик чегарачилар, инсонийлик ва аҳил қўшничилик тамойилларига амал қилган ҳолда, давлат чегарасини ёриб кирган афғонистонлик ҳарбийларга ҳеч қандай тўсиқсиз Тожикистон ҳудудига ўтишга рухсат берган. Афғонистон ҳарбий хизматчилари орасида 4 киши яраланган ва бир киши ҳалок бўлган.
Тожикистон ДМХҚ қайд этишича, тожик-афғон чегарасидаги вазият кескин деб баҳоланмоқда, «Шерхон-Бандар» ҳудудида яраланган, ҳалок бўлган ва асирга олинган афғон ҳарбий хизматчиларининг умумий сони — 100 кишигача.
Тасдиқланган маълумотга кўра, сўнгги ўн кундан буён Афғонистоннинг Тожикистон билан чегарадош бўлган тўртта вилоятида ҳукумат қўшинлари ва «Толибон» ҳаракати ўртасида жанговар тўқнашувлар давом этмоқда.
Натижада Таҳор вилоятидаги Чахёб, Янги Қалъа, Даркад, Дашти Қалъа, Хўжагор уездлари, Қундуз вилоятидаги Дашти Арчи, Имом Соҳиб ва Қалъаи Зол уездлари, шунингдек, «Шерхон-Бандар» ва «Кокул» назорат-ўтказиш пунктлари «Толибон» ҳаракати назорати остига ўтди.
Шерхон-Бандар Тожикистон ва Афғонистон ўртасидаги муҳим савдо ва юк тушириш-ортиш пункти ҳисобланади, у орқали Жанубий ва Жануби-Шарқий Осиёдан, шу жумладан, Покистон ва Эрондан Тожикистоннинг божхона импорти ўтади.
Ушбу чегара пости Тожикистоннинг Хатлон вилоятининг Панж тумани ҳамда Афғонистоннинг Қундуз провинциясидаги Имом Соҳиб тумани оралиғида жойлашган. Имом Соҳиб туманининг ўзи ҳам «Толибон» ҳаракати томонидан эгаллаб олинган.
Аввалроқ Ўзбекистон Афғонистон билан чегара ёпилишини маълум қилганди. Афғонистонда коронавирус инфекцияси билан боғлиқ эпидемиологик вазият кескинлашаётганини инобатга олиб, ўзбек-афғон давлат чегараси орқали фуқароларнинг ҳаракатланишини вақтинча тўхтатишга қарор қилинди.
