YouTube’даги WhistlinDiesel канали блогерлар дунёдаги энг ишончли автомобиллардан бири — Toyota Hilux пикапини синовдан ўтказгани тасвирланган видео билан бўлишди. Америкалик блогерлар синовни ўтказишда вертолётдан фойдаланган. Машина уч минг метр баландликка кўтарилган ва ерга ташлаб юборилган.

Кадр: YouTube

Toyota Hilux дунёдаги энг ишончли автомобиллардан бири ҳисобланади. Бу каби тасаввур нафақат машина эгалари ўртасида, балки суғурта компаниялари, автомобиль эҳтиёт қисмларини ишлаб чиқарувчилар ва техник хизмат кўрсатиш станциялари орасида ҳам шаклланган. Америкалик блогерлар ушбу техник тавсифларнинг барчасини ёнга суриб, моделнинг мустаҳкамлигини экстремал краш-тестда синаб кўришга қарор қилди.

Тажрибани ўтказиш учун автомобиль ишқибозлари Hilux’ни махсус осма арқон билан Kaman K-Max вертолётига боғлаган. Машинани ҳавога кўтарган блогерлар 150 метр баландликда уни арқондан узган. Бир неча сония парвоз қилган автомобиль капоти билан ерга урилган. Зарба оқибатида ўта ишончли пикап пачақланган бир уюм металлга айланган.

Бироқ Hilux’нинг «қийноқлари» бу билан тугамаган. Пачақланган пикап яна вертолёт ёрдамида ҳавога кўтарилиб, бу сафар 3000 метр баландликдан ташланган. 29 сониялик эркин парвоздан сўнг, автомобиль ерга урилган. Бу каби краш-тестдан кейин пикап металлоломга топшириб юборилади.

Эслатиб ўтамиз, 2020 йилнинг ноябрида Volvo компанияси экстремал краш-тест ўтказиб, унинг давомида ўнлаб автомобилларини 30 метр баландликда ерга ташлаганди.