Жо Байден ва Владимир Путиннинг учрашуви, бугун, 16 июнь куни бўлиб ўтади. АҚШ ва Россия президентлари Швейцариянинг Женева шаҳридаги La Grange вилласида юзма-юз музокара ўтказади. Женевада икки давлат раҳбарларининг ташрифи учун тайёргарлик ишлари давом этмоқда.

La Grange вилласи Женева кўли бўйида жойлашган. Унинг ёнига чодир ўрнатилди — бу саммитдаги ишлар учун медиа марказ бўлади

Фото: AP Photo

Атрофда хавфсизлик чоралари кучайтирилган. Суратда Villa La Grange яқинидаги радарлар

Фото: Reuters

Швейцария ҳукумати мамлакатнинг бошқа ҳудудларидан 900 нафар полициячи ва 1000 нафар ҳарбий хизматчини Женевага жўнатишга қарор қилди

Фото: Reuters

Ҳарбийлар дипломатик иншоотларни муҳофаза қилишда ёрдам бериб, ҳаво ҳудудини кузатиб боради

Фото: EPA

Фото: «ТАСС»

Музокаралар якунида Путин ва Байден қўшма матбуот анжумани ўтказмайди. The New York Times нашрининг ёзишича, Москва қўшма брифинг ўтказиш таклифини билдирган, Вашингтон эса буни рад қилган. Нашрнинг таъкидлашича, бунга 2018 йилда Трамп билан ўтказган матбуот анжуманида Путиннинг Америка раҳбаридан «устун келгани» сабаб бўлган.

Фото: «ТАСС»

Владимир Путин Женевага музокаралар ўтказиладиган 16 июнь куни келади. Бу унинг пандемия давомидаги биринчи хорижий сафари бўлади. АҚШ президенти Жо Байден эса 15 июнь, сешанба куни Женевага етиб келди. Аэропортда уни Швейцария президенти Ги Пармелин ва Женева кантон ҳукумати раҳбари Серж Дал Бюско кутиб олди. Байден InterContinental меҳмонхонасида қолади. Меҳмонхона ҳудуди ҳуқуқ-тартибот органлари ходимлари томонидан ўраб олинган.

Саммит уч қисмдан иборат бўлади: аввал тор доирадаги сўнг кенгайтирилган таркибдаги музокаралар, сўнгра танаффусдан кейин суҳбат давом этади

Фото: «ТАСС»

Музокаралар ва индивидуал матбуот анжуманларидан сўнг Путин Швейцария президенти Ги Пармелин билан учрашади

Фото: EPA

Россия делегацияси таркибида президентнинг ёрдамчиси Юрий Ушаков, президент матбуот котиби Дмитрий Песков, ташқи ишлар вазири Сергей Лавров ва унинг ўринбосари Сергей Рябков, АҚШдаги элчи Анатолий Антонов ва бош штаб бошлиғи Валерий Герасимов бўлади. Шунингдек, президент маъмурияти раҳбарининг ўринбосари Дмитрий Козак ва Сурия бўйича махсус вакили Александр Лаврентиев ҳам делегацияга таклиф қилинган.

Музокаралар танаффусларни ҳисобга олган ҳолда тўрт-беш соат давом этади, дея тахмин қилмоқда Кремль. Россия ташқи ишлар вазири Сергей Лавров ва АҚШ давлат котиби Энтони Блинкен тор доирадаги музокараларда қатнашади

Фото: Reuters

Фото: Reuters

Фото: Reuters

Meduza хабар беришича, 15 июнь куни кечқурун Женевада Россия колониясида сақланаётган мухолифатчи сиёсатчи Алексей Навальнийни қўллаб-қувватлаш учун митинг бўлиб ўтди. Видеоёзувларга қараганда акцияга ўнлаб одамлар тўпланган.

Улардан айримларининг қўлида Навальнийни қўллаб-қувватловчи (Free Navalniy) ва Россия президенти Владимир Путинга қарши (Putin, stop drinking blood of Russia) ёзувлар туширилган плакатлар бор. Йиғилганларнинг бир қисми Беларусь ва Украина байроқларини кўтариб олган. Намойишчилар «Йўқолсин шоҳ!», «Путинсиз Россия!», «Россия озод бўлади!» каби  шиорларни айтиб бақирган.