Ҳиндистонда кучли муссон ёмғирлари ерни ювиб юбориб, турли фавқулодда ҳолатларни юзага келтирмоқда. Хусусан, Мумбайдаги автотураргоҳда жойлашган машина бутунлай сув остига ғарқ бўлди, деб хабар беради Esquire.
Кўнгилсиз ҳодиса 13 июнь куни Гаткопар туманида содир бўлган. Маҳаллий аҳолининг сўзларига кўра, автотураргоҳ ҳудудида олдин 15 метрли қудуқ жойлашган бўлган. Юз йиллик қудуқ жойида автотураргоҳ қуриш учун унга бетон тўлдирилган. Бироқ бир ҳафта олдин ёғишни бошлаган ёмғирлар уни ювиб юбормоқда.
Автомобиль эгаси бўлган Панкаж Мехта бир неча сония ичида сув остига чўкиб кетган машинасини видеога олишга муваффақ бўлган. Ролик эса интернетда вирус каби тарқалган.
«Болалар машина сув остига ғарб бўлаётганида бақира бошлади. Мен дарҳол пастга отилдим. Автомобиль ярмига қадар сувга чўкиб бўлганди ва мен видеога олишни бошладим. Бирор нима қилишга улгурмасдим, машина кўз ўнгимда сув остига чўкиб кетди», — дейди Мехта.
Содир бўлган воқеа ҳақида шаҳар расмийларига хабар берилган. Ҳодиса жойига ўт ўчирувчилар ва полициячилар етиб келган. Тахминан 12 соатдан сўнг автомобиль кран ёрдамида қудуқдан чиқариб олинган.
«Кўнгилсиз ҳодиса оқибатида ҳеч кимга жароҳат етмаган, машина ичида ҳеч ким бўлмагани сабаб қурбонлар йўқ», — дейди амалдор.
Аввалроқ журналист аёл тўғридан-тўғри эфир вақтида сувга чўкиб кетаётган юк машина ҳайдовчисини қутқариб қолгани тўғрисида хабар берилганди.
Изоҳ (0)