Hindistonda kuchli musson yomg‘irlari yerni yuvib yuborib, turli favqulodda holatlarni yuzaga keltirmoqda. Xususan, Mumbaydagi avtoturargohda joylashgan mashina butunlay suv ostiga g‘arq bo‘ldi, deb xabar beradi Esquire.
Ko‘ngilsiz hodisa 13-iyun kuni Gatkopar tumanida sodir bo‘lgan. Mahalliy aholining so‘zlariga ko‘ra, avtoturargoh hududida oldin 15 metrli quduq joylashgan bo‘lgan. Yuz yillik quduq joyida avtoturargoh qurish uchun unga beton to‘ldirilgan. Biroq bir hafta oldin yog‘ishni boshlagan yomg‘irlar uni yuvib yubormoqda.
Avtomobil egasi bo‘lgan Pankaj Mexta bir necha soniya ichida suv ostiga cho‘kib ketgan mashinasini videoga olishga muvaffaq bo‘lgan. Rolik esa internetda virus kabi tarqalgan.
“Bolalar mashina suv ostiga g‘arb bo‘layotganida baqira boshladi. Men darhol pastga otildim. Avtomobil yarmiga qadar suvga cho‘kib bo‘lgandi va men videoga olishni boshladim. Biror nima qilishga ulgurmasdim, mashina ko‘z o‘ngimda suv ostiga cho‘kib ketdi”, — deydi Mexta.
Sodir bo‘lgan voqea haqida shahar rasmiylariga xabar berilgan. Hodisa joyiga o‘t o‘chiruvchilar va politsiyachilar yetib kelgan. Taxminan 12 soatdan so‘ng avtomobil kran yordamida quduqdan chiqarib olingan.
“Ko‘ngilsiz hodisa oqibatida hech kimga jarohat yetmagan, mashina ichida hech kim bo‘lmagani sabab qurbonlar yo‘q”, — deydi amaldor.
Avvalroq jurnalist ayol to‘g‘ridan to‘g‘ri efir vaqtida suvga cho‘kib ketayotgan yuk mashina haydovchisini qutqarib qolgani to‘g‘risida xabar berilgandi.
Izoh (0)