«Золушка учун уч ёнғоқ» фильми юлдузи Либуше Шафранкова вафот этди

Онкологик касалликдан азият чекиб келган актриса Либуше Шафранкова 68 ёшида Чехияда вафот этди, деб хабар беради Cosmopolitan.

1973 йилда эфир юзини кўрган «Золушка учун уч ёнғоқ» фильмида бош ролни ижро этган актрисанинг вафотини унинг ўғли Йозеф Абргам CNN Prime News канали билан суҳбатда тасдиқлаган.

Шафранкованинг соғлиғи билан боғлиқ муаммолари 2009 йилда бошланган. Бунинг оқибатида актриса ўзи иштирок этаётган бир нечта лойиҳани тўхтатиб қўйган. Бироқ киноюлдуз касалликни енгиб, ишга қайтишга куч топган. «Ишонч, оила, иш — ҳаётимнинг асосий мазмуни», — деган эди актриса.

2014 йилда шифокорлар Либушега ўпка саратони ташхисини қўйган. У муваффақиятли операция қилинган, бир йилдан сўнг Чехия президенти актрисани санъат соҳасидаги давлат мукофоти билан тақдирлаган.

Либуше Чехословакиянинг Брно шаҳрида туғилган, болалигидан театрга қизиққан. Биринчи бор машҳурликни унга Божена Немсованинг «Бувижон» қиссаси асосида экранлаштирилган фильмдаги роли олиб келган. Актриса экранда ёзувчининг ёшлигини гавдалантирган. Либуше Брнодаги театр мактабини тамомлагач, «Драматик клуб» театрида роль ижро эта бошлаган ва у ерда Йозеф Абргам билан танишган. Актёр кейинчалик киноюлдузнинг турмуш ўртоғига айланган.

Томошабинлар Шафранковани асосан «Золушга учун уч ёнғоқ» фильми орқали эслаб қолган. 19 ёшли қиз тезда халқнинг севимли актрисасига айланган. Бундан ташқари, Либуше «Шаҳзода ва тунги юлдуз», «Учинчи шаҳзода», «Қор парчалари байрами», «Коля» каби фильмларда, «Уч ҳомиладор», «Ваня амаки», «Балиқчи қуш» номли спектаклларда роль ижро этган. Шафранкованинг фильмографиясида жами 50 дан ортиқ картина мавжуд.

Аввалроқ «Буратинонинг саргузаштлари» фильмидаги Малвина роли орқали танилган актриса Татяна Проценко 53 ёшида вафот этгани тўғрисида хабар берилганди.