Мўғулистонда 9 июнь куни бўлиб ўтган умуммиллий президент сайловларида ҳукмрон Мўғил халқ партияси номзоди Ухнаагийн Хурельсух ғалаба қозонди. Шу тариқа ушбу сиёсий ташкилот ўз мавқейини янада мустаҳкамлади, деб ёзади «ТАСС».
Бош сайлов комиссиясининг дастлабки маълумотларига кўра, сайловчиларнинг тахминан 70 фоизи Хурельсухга овоз берган.
Хурельсухнинг асосий рақиби — парламентнинг собиқ депутати Дангаасуренгийн Энхбат учун сайлов участкаларига ташриф буюрган фуқароларнинг тахминан 25 фоизи овоз берди. Учинчи номзод — мухолифатчи Демократик партиянинг собиқ раиси Содномзундуйн Эрденени қўллаб-қувватлаш даражаси атиги 5-6 фоизни ташкил этди.
Мўғулистонда президент сайловлари маҳаллий вақт билан соат 07:00 да (Тошкент вақти билан 04:00) бошланиб, 22:00 да (Тошкент вақти билан 19:00) якунланган. Умумий ҳисобда мамлакат ҳудудида 2 мингга яқин сайлов участкалари очилганди. Бош сайлов комиссиясининг ҳисоб-китобларига кўра, сайлов участкалари ёпилишидан ярим соат олдин овоз бериш ҳуқуқига эга бўлган 2 миллиондан ортиқ сайловчидан 1,17 миллиондан ортиғи овоз бериб бўлган. Конституцияга киритилган ўзгартишларга кўра, мамлакат аҳолиси биринчи марта давлат раҳбарини олти йилга сайлади.
Президентлик сайловларида қатнашувчилар 52,69 фоизни ташкил этган. Кекса авлод энг катта сиёсий фаолликни кўрсатган бўлса, 20 ёшдан 34 ёшгача бўлган ёшлар ҳокимият учун курашда ким ғолиб бўлишига ва келгуси олти йил ичида мамлакатни ким бошқаришига унчалик қизиқиш билдирмаган.
«Монсаме» агентлиги маълумотларига кўра, сайлов участкаларидаги овоз бериш жараёни бир неча ўнлаб мўғулистонлик ва чет эллик журналистлар томонидан ёритиб турилган. Мамлакат ҳукумати Европа Иттифоқи мамлакатлари вакилларини ҳамда АҚШнинг Улан-Батордаги элчиси Майкл Клеческини кузатувчи сифатида сайловга таклиф қилган. Шунингдек, жараённи халқаро ташкилотларнинг 40 га яқин вакиллари ҳам кузатиб борган.
Изоҳ (0)