“Tashkent City hududida yer ajratish masalalari qonuniy hal etilgan” — adliya vaziri

Tashkent City maxsus hududmi? Nega qurilishi deyarli yakunlangan binolar hamon hujjatsiz? Bu savolga AOKAda 9-iyun kuni o‘tkazilgan matbuot anjumanida adliya vaziri Ruslanbek Davletov aniqlik kiritdi.

Eslatib o‘tamiz, Murod Nazarov “Rost24.uz” saytiga bergan intervyusida Tashkent City hududi maxsus hudud bo‘lib, u yerda qurilish ishlari amalga oshirilayotgan binolarning birortasi tegishli quyi idoralarning tasdig‘idan o‘tmaganini aytgandi.

“Agar bu haqda biror-bir tadbirkor subyektiv fikrini aytgan bo‘lsa, bu uning o‘z fikri. Maxsus hududlar ‘Iqtisodiy hududlar to‘g‘risida’gi qonun bilan tartibga solinadi, masalan, sanoat bilan bog‘liq erkin iqtisodiy zonalar. Boshqa kimningdir shaxsiy fikri rasmiy ahamiyatga ega emas”, — degan Ruslanbek Davletov.

Adliya vazirining ta’kidlashicha, Tashkent City hududida yer ajratish masalalari qonuniy hal etilgan. Qurilish obyektini qurishda lozim bo‘lgan hujjatlar turi juda ko‘p. Ular orasida qurilish boshlanmasdan tayyor bo‘ladigani ham, qurilish jarayoni bilan parallel tayyorlanadigan hujjatlar ham bor.

“Agar qaysidir qurilish obyektining tayyor bo‘lishi kerak bo‘lgan hujjati hamon yo‘q ekanini aniq aytadigan bo‘lsangiz, shunda unga qonuniy baho berish mumkin bo‘ladi”, — degan u.