АҚШ Адлия вазирлиги мамлакат собиқ президенти Дональд Трамп тарафдорларининг ҳужуми натижасида Капитолийга етказилган зарарни 1,5 миллион долларга баҳолади, деб ёзмоқда The Washington Post.
Газетанинг маълумотларига кўра, зарар миқдори бўйича ҳисоб-китоб воқеа иштирокчиларидан бирининг иши бўйича суд мажлиси ҳужжатларида мавжуд бўлиб, прокуратура бу суммани судланувчилардан ундиришни режалаштирмоқда: енгилроқ жиноятларда айбдор деб топилганлар учун 500 доллар, жиддийроқ модда билан айбланганлар учун 2000 доллар миқдорида жарима белгилаш кўзда тутилган.
Капитолий бош архитектори вакилларининг нашрга хабар беришича, улар зарарни баҳолаб, ҳукуматга тақдим этган, бу кейинчалик Адлия вазирлигининг ҳисоб-китоблари учун асос бўлди.
Эслатиб ўтамиз, 6 январь куни конгресс аъзолари Дональд Трампнинг президентлик сайловларида мағлуб бўлганини тасдиқлаш учун йиғилган вақтда унинг тарафдорлари Конгрессга бостириб кирган. Полиция бир неча соат ўтибгина намойишчиларни Капитолийдан ҳайдаб чиқаришга муваффақ бўлган. Ҳуқуқ-тартибот органлари ходимлари ўқотар қурол, дубинка, кўздан ёш оқизувчи газдан фойдаланган. Капитолийнинг хавфсизлик ходими билан биргаликда, беш киши ҳалок бўлган. Тартибсизликдан кейин федерал қидирив бўлими намойиш иштирокчиларига қарши 160 дан ортиқ иш очган.
АҚШ ҳукуматининг хабар беришича, Капитолийга қилинган ҳужум натижасида тарихий аҳамиятга эга санъат асарлари ва мебеллар зарар кўрган.
Аввалроқ 6 январь куни уйиштирилган ҳужумдан кейин Капитолийни таъмирлаш учун 30 миллион доллар талаб этилиши маълум бўлди. Ҳужумда 300 нафардан ортиқ одам айбланди ва уларнинг энг камида 280 нафари ҳибсга олинди.
Изоҳ (0)