Бухорода анъанавий «Ипак ва зираворлар» фестивали бўлиб ўтмоқда
Бухорода 19-анъанавий халқаро «Ипак ва зираворлар» фестивалининг очилиш маросими бўлиб ўтди. Бухоро Аркида бўлиб ўтаётган тадбирда Россиянинг Рязань ва Коми шаҳарларидан, шунингдек, Ҳиндистон, Германия ва Сингапур каби қатор давлатлардан ташриф буюрган маданият ва санъат арбоблари, халқаро ташкилотлар ва дипломатик корпус вакиллари, расмий тур-операторлар қатнашмоқда, дея хабар берди «Дарё» мухбири.
Вилоят ҳамда Бухоро шаҳар ҳокимлиги, вилоят Туризм ва спорт масалаларини ривожлантириш бошқармаси, «Ҳунарманд» уюшмаси, Маданият бошқармаси ҳамда бошқа қатор ташкилотлар ҳамкорлигидаги фестивалда 20 дан ортиқ дипломатик ваколатхоналарнинг 150 нафарга яқин вакили ҳамда хорижий меҳмонлар иштирок этмоқда.
Фестивальни Бухоро шаҳри ҳокими Жамол Носиров табрик сўзи билан очиб берган ва фестивалнинг нуфузи йилдан йилга ошиб, қамрови кенгаяётганини таъкидлаган.
Қайд этилишича, фестивални ёритиш учун Тожикистон, Эрон, Франция, Туркия ҳамда Озарбайжон давлатларидан оммавий ахборот воситалари ходимлари келган.
«Бухоройи шариф бизнинг ҳам қадриятларимизга бешик. Айнан шу фестивалда иштирок этиш учун Бухорога тўртинчи бор келяпман. Ҳар гал маҳобатли ва жўшқин карвон билан бирга юраман. Бундай фестиваллар Туркия давлатида ҳам тез-тез ўтказиб турилади, аммо уларнинг кўлами бу қадар кенг ва жозибали эмас. Менга тарихий шаҳар Бухоронинг, нафақат қадим гўзалликлари, балки одамларининг ҳам самимий ва хушчақчақлиги жуда ёқади», — дейди Туркия элчихонаси маданият ва туризм маслаҳатчиси Алпарслан Акинжи «Дарё» мухбири билан суҳбатда.
Фестивальда Ўзбекистон ёшлар иттифоқи Бухоро вилояти кенгаши муассислигидаги «Бухоро ёшлари» газетасининг XIX-анъанавий халқаро «Ипак ва зираворлар» фестивалига бағишланган махсус сони чоп этилиб, бепул тарқатилди.
